Zialenski vystupiŭ z maksimalna rezkim zvarotam z nahody Dnia niezaležnaści
Nazvaŭ Pucina «chvorym dziedam z vyćviłymi vačyma» i skazaŭ, što ŭkrainskaje pravasłaŭje vyzvalajecca ad «maskoŭskich čarciej». Zvarot byŭ zapisany ŭ Sumskaj vobłaści, na miažy z Rasijaj.
Prezident Uładzimir Zialenski pavinšavaŭ ukraincaŭ z 33-j hadavinaj Dnia Niezaležnaści Ukrainy.
«Siońnia my adznačajem 33-y Dzień Niezaležnaści Ukrainy. A toje, što nios na našu ziamlu vorah, ciapier viarnułasia ŭ jaho dom. I toj, chto chacieŭ pieratvaryć našy ziemli ŭ bufiernuju zonu, pavinien dumać, kab jaho kraina nie stała Bufiernaj Fiederacyjaj».
Zialenski adznačyŭ, što zapisaŭ svoj 13-chvilinny zvarot u Sumskaj vobłaści niepadalok ad miažy z Rasijaj.
«Sumščyna. Mahryca. Rečka Psieł. Niekalki kiłamietraŭ ad našaj miažy. Miažy pamiž Ukrainaj i niavolaj, pamiž žyćciom i śmierciu. Miažy pamiž niezaležnaj jeŭrapiejskaj dziaržavaj i terarystyčnaj arhanizacyjaj numar adzin u śviecie», — skazaŭ jon.
Taksama Zialenski padkreśliŭ, što Ukraina ździviła śviet, pačaŭšy paśpiachovuju vajennuju apieracyju ŭ Kurskaj vobłaści RF, a rasijskija ŭłady čarhovy raz prademanstravali svaju abyjakavaść da ŭłasnych hramadzian.
«33 hady tamu Ukraina adradziłasia na kartach śvietu, a siońnia Ukraina pakaraje sercy śvietu. Natchniaje advahaj. Słužyć prykładam, jak nie bajacca Pucina. I abjadnoŭvaje Ziamlu vakoł svajho, ukrainskaha śvietapohladu: u XXI stahodździ terarysty pavinny spačyvać u Haazie, a nie na Vałdai. I nichto ŭ śviecie bolš nie skaža: «Where is Ukraine?» Bo na kožnym kantyniencie ciapier kažuć: «Ukraine must win». Heta zaradžaje našu niezaležnaść. Našu Ukrainu», — skazaŭ jon.
Akramia taho, Zialenski padziakavaŭ usim ukraincam i zamiežnikam, jakija abaraniajuć niezaležnaść krainy i paabiacaŭ, što Rasija adkaža za ataki pa terytoryi Ukrainy: «Ukraincy zaŭsiody viartajuć pazyki. I toj, chto zyčyŭ našaj ziamli biady, atrymaje jaje ŭ siabie doma. Z pracentami. Toj, chto choča siejać na našaj ziamli zło, budzie pažynać jaho plon na svajoj terytoryi. Heta nie praroctva, nie złaradnaść, nie ślapaja pomsta, heta — zakanamiernaść. Spraviadlivaść. Bumieranh dla zła».
Kamientary