Jon prapanuje zaprasić na Zachad pradstaŭnikoŭ Minska i «pahavaryć kankretna ab vyzvaleńni palitviaźniaŭ».
Dla vyzvaleńnia palitviaźniaŭ nieabchodna sprabavać ustupić u pieramovy z režymam Alaksandra Łukašenki i prapanavać viarnuć ambasadaraŭ zachodnich krain. Takuju dumku vykazaŭ lidar ruchu «Volnaja Biełaruś» Zianon Paźniak u efiry jutub-kanału Warta 23 žniŭnia, piša «Pozirk».
Palityk prapanavaŭ razhladać palitźniavolenych jak pałonnych na vajnie.
«Nichto nie kantaktuje z čynoŭnikami, ni z [ministram zamiežnych spraŭ Maksimam] Ryžankovym nie kantaktuje. ⟨…⟩ Niama nijakich pieramoŭ. I značyć, buduć tolki łozunhi: «Vyzvalajcie palitviaźniaŭ, inačaj my vam hranicu pierakryjem», — skazaŭ jon. — Jany (ułady) čychali na heta ŭsio».
Vykarystoŭvać mahčymaści mohuć tyja, chto vałodaje «srodkami abmienu», adznačyŭ Paźniak.
«Što my možam abmianiać? Sankcyi», — skazaŭ jon.
Palityk raskrytykavaŭ prapanovu siabra Kaardynacyjnaj rady palitołaha Andreja Jahorava častkova pryznać lehitymnaść Łukašenki ŭ abmien na vyzvaleńnie palitviaźniaŭ, nazvaŭšy jaje «łuchtoj, jakaja ni da čaho nie pryviadzie, akramia tolki taho, što ź ludziej buduć śmiajacca».
«Ale tut jość racyjanalnaje ziernie, kali da hetaha padyści ź viedańniem jurydyčnym i žadańniem palityčnym», — dadaŭ kiraŭnik «Volnaj Biełarusi».
Pavodle jaho, z 1996 hoda ni adna vybarčaja kampanija ŭ Biełarusi nie była pryznanyja Zachadam: «I heta była nielihitymnaja ŭłada. A byli ambasady. ⟨…⟩ Pa fakcie byli kantakty, i byli vyniki hetych kantaktaŭ. Ale heta nie značyć, što jaho (Łukašenku) pryznali lehitymnym».
«Nu davajcie, dajcie mahčymaść pryznańnia jaho pa fakcie. ⟨…⟩ Heta značyć, što možna viarnuć ambasady niekatoryja (h. zn. ambasadaraŭ), niekatorych pradstaŭnikoŭ. Heta daść mahčymaść niekatorych jaho čynoŭnikaŭ zaprasić na Zachad, taho ž samaha ministra zamiežnych spraŭ, jakoha jon pryznačyŭ. I pahavaryć kankretna ab vyzvaleńni palitviaźniaŭ, — zajaviŭ palityk. — A razmova takaja: «Što vy chočacie [uzamien]?» Inačaj ničoha nie adbyvajecca. Heta vajna».
***
16 žniŭnia stała viadoma, što Łukašenka pamiłavaŭ 30 čałaviek (16 mužčyn i 14 žančyn). Pravaabaroncam viadomy proźviščy 22 čałaviek. Siarod ich žurnalistka Ksienija Łuckina z puchlinaj mozhu, Volha Novikava, Ała Zujeva, Volha Stabroŭskaja, 74-hadovy prafsajuzny lidar Vasil Bieraśnieŭ, Iryna Sankoŭskaja, Kaciaryna Leŭ, Natalla Piatrovič, Tamara Karavaj, Śviatłana Pałuektava, Jaŭhien Čumiła. Učora stała viadoma pra vyzvaleńnie Paŭła Kučynskaha — z čaćviertaj stadyjaj ankałohii.
Ciapier čytajuć
Minski haradski sud nie vytrymlivaje nahruzki — nie paśpiavajuć sudzić palitviaźniaŭ4
Kamientary