Da $1900: pahladzieli, jakija kvatery prapanujuć u arendu studentam u Minsku napiaredadni navučalnaha hoda
Ličanyja dni zastalisia da taho momantu, kali Minsk nakryje chvala studentaŭ z roznych kutkoŭ Biełarusi. Pahladzieli, jakija kvatery i pa jakim košcie im prapanoŭvajuć arandavać.
$1900: šykoŭnaja trochpakajoŭka kala cyrka
Nie kožny ŭłaśnik hatovy zdavać žyllo studentam. Ščyra kažučy, heta zrazumieła: jość pytańni i pa płaciežazdolnaści takich arandataraŭ, i pa ładzie žyćcia. Ale jość i vyklučeńni.
Sapraŭdy šykoŭnuju trochpakajoŭku z dyzajnierskim ramontam u samym centry stalicy (z voknaŭ bačny Biełaruski dziaržaŭny cyrk) hatovy zdać u arendu studentam. Płošča kvatery 106 kvadrataŭ, dziakujučy pierapłaniroŭcy kuchniu pašyryli amal da 27 kvadrataŭ.
«Usio azdableńnie z čyrvonaha dreva. Na padłozie ŭ pakojach parkiet, na kuchni — hranit. Usia mebla z dreva (vytvorčaść Italija). Usie padakońniki z marmuru», — napisana ŭ abjavie.
Za takuju raskošu prosiać $1900 za miesiac, abaviazkova pieradapłata za 3 miesiacy.
$1150: dvuchpaviarchovaja kvatera z džakuzi ŭ Ždanovičach
U dvuchpaviarchovuju kvateru, jakaja znachodzicca za kiłamietr ad kalcavoj, hatovyja zasialić ažno 6 studentaŭ adrazu. Iści da elektryčki na Minsk — 5 chvilin.
Paznačana, što ramont dyzajnierski (ale pytańni da hustu taho dyzajniera, kaniečnie, jość). Zatoje na 137 kvadratach płoščy jość čatyry pakoi, dva sanvuzły i navat vanny pakoj z džakuzi.
$650: trochpakajoŭka ŭ «Minsk-Śviecie»
Šmat chto nabyvaŭ kvatery ŭ «Minsk-Śviecie» ŭ jakaści inviestycyj. Tamu ciapier aktyŭna źjaŭlajucca prapanovy arendy ŭ novych damach. Voś, naprykład, trochpakajoŭka ŭ domie, jaki byŭ pabudavany ŭ 2022 hodzie.
Płošča 63 kvadraty, akuratny ramont, jość usia nieabchodnaja mebla i technika. Paznačana, što prapisany adzin čałaviek, tamu kamunałka budzie minimalnaj. Pieradapłatu prosiać za miesiac plus jašče zakład u takim samym pamiery. Košt samoj kvatery — $650 za miesiac.
$600: ścipłaja dvuchpakajoŭka z sastarełaj meblaj
Uładalnica dvuchpakajovaj kvatery ŭ Michajłaŭskim zavułku šukaje ŭ arandatary kankretna studentaŭ. Łakacyja, kaniešnie, niebłahaja, ale sama kvatera vyklikaje pytańniečki: nievialikija pakojčyki, kuchnia ŭsiaho 8 kvadrataŭ, sastareły ramont i vidavočna nie novaja mebla. Za spartanskija ŭmovy žančyna choča atrymlivać $600 štomiesiac.
Darečy, na hetuju kvateru źviarnuli ŭvahu i karystalniki tyktoku. Adzin z błohieraŭ žartaŭliva pacikaviŭsia ŭ haspadyni: «Čamu tak tanna vyrašyli zdać?». Zdajecca, toj ironija nie spadabałasia: «U vieraśni budzie daražej, možacie pačakać».
$159: dva pakoi ŭ kamunałcy
Heta samaja tannaja prapanova, jakuju my znajšli. Za $159 prapanoŭvajuć 2 sumiežnyja pakoi ŭ kamunalnaj kvatery na pieršym paviersie, jakaja znachodzicca ŭ mikrarajonie Sosny.
U abjavie abiacajuć, što susiedzi cichija i źjaŭlajucca ŭ kamunałcy nie časta.
Ciapier čytajuć
Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali5
Kamientary