Indaniezija ŭpieršyniu adśviatkavała Dzień niezaležnaści ŭ budučaj stalicy
Heta pry tym, što sam praces pieranosu zavieršycca tolki da 2045 hoda.
Śviatkavańnie Dnia niezaležnaści Indaniezii ŭpieršyniu pravodziłasia ŭ budučaj stalicy krainy — horadzie Nusantara, jaki jašče tolki budujecca na vostravie Barnea (Kalimantan). U cyrymonii ŭ subotu, 17 žniŭnia, uziali ŭdzieł prezident Džoka Vidoda i jahony pierajemnik Prabava Subijanta, a taksama členy Kabinieta ministraŭ i pradstaŭniki armii, piša Deutsche Welle.
Pavodle pieršapačatkovych płanaŭ, na ŭračystaści ŭ Nusantaru pavinny byli pryjechać 8000 haściej, ale z-za niedachopu žylla i budaŭničych rabot, jakija jašče iduć, ich śpis pryjšłosia skaracić da 2000 čałaviek.
Užo niekalki dzion tamu prezident Džoka Vidoda pravioŭ u Nusantary pieršaje pasiadžeńnie ŭrada.
Pra pieranos stalicy z Džakarty na vostravie Java było abvieščana ŭ 2019 hodzie. Asnoŭnaj pryčynaj nazyvałasia toje, što Džakarta pieranasielenaja i znachodzicca pad pahrozaj apuskańnia ŭ mora, a bolšaja častka horada ŭžo znachodzicca nižej za ŭzrovień mora. Pa raźlikach, da 2050 hoda moža być zatoplenaja ŭsia paŭnočnaja častka Džakarty. Da admoŭnych bakoŭ staroj stalicy, jakaja naličvaje 11 młn žycharoŭ (a ŭklučajučy vakolicy — amal 34 młn), adnosiać taksama chaos na darohach i smoh.
Nusantara znachodzicca prykładna za dźvie hadziny palotu na paŭnočny ŭschod ad Džakarty ŭ pravincyi Uschodni Kalimantan na indaniezijskaj častcy vostrava Barnea. Budaŭničyja raboty pa stvareńni novaha horada pačalisia ŭ 2022 hodzie. Pieršapačatkova płanavałasia, što aficyjna stalica pierajedzie da Dnia niezaležnaści, 17 žniŭnia, adnak budaŭnictva zaciahnułasia, siarod inšaha, z-za adsutnaści zamiežnych inviestycyj i ziamielnych sprečak.
Miarkujecca, što ŭkaz ab prysvajeńni Nusantary staličnaha statusu moža padpisać užo novy prezident, jaki ŭstupić na pasadu ŭ kastryčniku, a całkam prajekt moža być zavieršany tolki ŭ 2045 hodzie.
Ekołahi papiaredžvajuć, što budaŭnictva horada moža paskoryć vysiakańnie džunhlaŭ u adnym z najbujniejšych u śviecie rehijonaŭ z trapičnymi lasami.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary