Kab raspaŭsiudzić fejk pra žonku Zialenskaha, rasijanie stvaryli falšyvy francuzski ŚMI
Rasijskaja prapahanda masava raspaŭsiudziła navinu pra toje, što Alena Zialenskaja nibyta kupiła šykoŭny aŭtamabil Bugatti za $4,5 miljona. Pryčym sa spasyłkaj francuzskaje miedyja Vérité Cachée. Ale što chavajecca za hetym?
Dniami kramloŭskija ŚMI razam apublikavali siensacyjnuju navinu pra žonku prezidenta Ukrainy. Jany raskazali, što francuzski partał Vérité Cachée (nazva pierakładajecca jak «schavanaja praŭda») daviedaŭsia pra novuju pakupku Aleny Zialenskaj — novy hipierkar Bugatti Tourbillon za 4,5 miljona dalaraŭ. Jana nibyta aformiła ździełku padčas pajezdki ŭ Francyju z mužam na 80-hodździe sa dnia vysadki sajuźnikaŭ u Narmandyi.
Zialenskaja, jak śćviardžajuć prapahandysty, stała pieršaj ułaśnicaj padobnaha aŭto, jakich płanujuć vypuścić usiaho 250 štuk i tolki ŭ 2026 hodzie.
Jak piša Insider, źniešnie sajt Vérité Cachée padobny da zvyčajnaha anłajn-ŚMI. Ale isnuje jon usiaho niekalki dzion: internet-archiŭ upieršyniu znajšoŭ jaho tolki 25 červienia 2024 hoda.
Kali pryhledziecca, bačnyja niekatoryja padazronyja rečy, naprykład, nazva adnaho z artykułaŭ na anhlijskaj movie, choć sam artykuł na francuzskaj.
Pry analizie tekstaŭ artykułaŭ śpiecyjalizavanymi servisami vyśvietliłasia, što napisanyja jany štučnym intelektam. Za vyklučeńniem adnaho-adzinaha materyjału — ab kupli Bugatti Alenaj Zialenskaj. Ale aŭtar zrabiŭ pamyłku — u naźvie madeli Bugatti Tourbillon jon napisaŭ Turbillon.
Artykuł prailustravany fatahrafijaj dakumienta — paćviardžeńnia papiaredniaj zamovy mašyny na imia Zialenskaj. Ale ŭ adrasie aŭtasałona zrabili pamyłku ŭ naźvie paryžskaha pryharada Nioi-siur-Sen, dzie jon znachodzicca, — zamiest Neuilly-sur-Seine napisana Neuily-sur-Seine. Pryčym heta nie vypadkovaja pamyłka druku, pamyłka paŭtarajecca dvojčy.
Dla bolšaha davieru aŭtary artykuła prykłali jašče i videa, dzie niechta, pradstaŭleny jak supracoŭnik dylerskaha centra Bugatti pa imieni Žak Bierten, raskazvaje, jak jon hanarycca tym, što žonka prezidenta stała «častkaj siamji Bugatti». Interjer aŭtamabila, u jakim źniata videa, nie padobny ni da adnoj z madelaŭ Bugatti.
Zanadta starannaje vymaŭleńnie vydaje ŭ «Biertenie» zamiežnika. A samo videa, padobna, taksama praca štučnaha intelektu: anłajn-servisy raspaznańnia asob vyjaŭlajuć, što ź vialikaj vierahodnaściu (86% supadzieńnia) «Bierten» — heta asoba z fotabanka Shutterstock, dzie jana padpisana «ščaślivy małady mužčyna».
Vérité Cachée — nie pieršy fejkavy ŚMI, stvorany rasijskimi prapahandystami. Raniej užo paviedamlałasia ab nieisnujučaj niamieckaj haziecie Globus Deutschland i nibyta polskim vydańni Niezależny Dziennik Polityczny, jakija publikavali prakramloŭskija materyjały.
Ina Kulej: Milinkievič pieramoh śmierć, ale šlach da poŭnaha adužańnia niablizki4
Kamientary