26 červienia vyjšaŭ na volu, całkam adbyŭšy pakarańnie, były palitźniavoleny Dźmitryj Ščarbin sa Žłobina, piša «Homielskaja viasna».
Dźmitryja Ščarbina zatrymali ŭ kastryčniku 2023 hoda za kamientary ŭ sacyjalnych sietkach. Na jaho była zaviedziena kryminalnaja sprava pavodle č. 1 art. 130 (raspalvańnie rasavaj, nacyjanalnaj, relihijnaj albo inšaj sacyjalnaj varožaści albo varažniečy) Kryminalnaha kodeksa.
28 lutaha sudździa Homielskaha abłasnoha suda Vadzim Bobyraŭ prysudziŭ Dźmitryja da 1 hoda pazbaŭleńnia voli va ŭmovach ahulnaha režymu. Pakarańnie jon adbyvaŭ u papraŭčaj kałonii № 17 u Škłovie.
Pry hetym paśla taho, jak Dźmitryja zatrymali, siłaviki paviedamlali ŭ svaim kanale:
«Paśla ščyraj hutarki z supracoŭnikami pravaachoŭnych orhanaŭ i vyraznaj acenki svaich dziejańniaŭ jon moža spakojna žyć i pracavać. Tak što milicyja vykarystoŭvaje nie tolki siłavyja mietady, ale i razmovy pa dušach. Pałku nichto nie pierahinaje».
Ale ŭrešcie akazałasia, što heta tolki ničoha nie vartyja słovy.
12 sakavika pravaabarončaja supolnaść pryznała Dźmitryja Ščarbina palitźniavolenym. 24 maja Ministerstva ŭnutranych spraŭ uniesła jaho ŭ śpis «asob, datyčnych da ekstremisckaj dziejnaści».
Kamientary