Źbitamu milicyjantami vaŭkavyskamu rabočamu nie pavieryŭ rajonny sud — ale pavieryŭ abłasny

Rabočy ŭviečary byŭ u miascovaj balnicy, kali staršy siaržant i lejtenant DAI advieźli jaho ŭ RAUS dla razboru pavodle art.19.6 KaAP «Zaviedama iłžyvaje paviedamleńnie». Mužčyna śćviardžaje, što ŭ aŭtamabili jamu apuskali šapku na vočy i dvojčy ŭdaryli pa tvary dałoniami. U kabiniecie RAUS jaho biez pryčyny bili nahami pa hałavie i nahach, padymali i kidali na padłohu, adzin z supracoŭnikaŭ dušyŭ. Taksama čatyry razy jaho ŭdaryli dałoniami pa tvary.

Pra heta mužčyna raspavioŭ na nastupny dzień paśla abiedu śledčamu, jaki pryjechaŭ u CRB. Źbićcio ličyłasia b pieravyšeńniem ułady abo słužbovych paŭnamoctvaŭ (č. 3 art. 426 KK). Za heta pahražaje da 10 hadoŭ pazbaŭleńnia voli. Ekśpiert pryznaŭ, što ŭ źbitaha jość lohkija cialesnyja paškodžańni.

Dvoje daišnikaŭ raskazali, što pryjechali pa vykliku pa fakcie DTZ. Jany zatrymali mužčynu. Pa ich śćviardžeńni, jaho nie bili ni pry dastaŭleńni, ni ŭ kabiniecie. A fizičnuju siłu i kajdanki ŭžyli, tamu što jon akazaŭ im niepadparadkavańnie. Śviedka i ŭčastkovy raskazaŭ, što zatrymany pavodziŭ siabie nieadekvatna — jaho davodziłasia nieści ŭ słužbovy kabiniet.

Pavodle viersii suda, na videarehistratarach nie vidać, što zatrymanaha źbivajuć. U apielacyi mužčyna źviartaje ŭvahu na toje, što videarehistratary supracoŭnikaŭ milicyi pieryjadyčna adklučajucca. A kali ŭklučajucca znoŭ, u jaho bačnyja ŭdary.

Sud: zakonnaje prymianieńnie siły

Raniej i sam miascovy žychar kazaŭ pra toje, što jamu pahražali prymianieńniem siły, a nie pra samo jaje ŭžyvańnie. Sud paličyŭ, što paboi abumoŭlenyja zakonnym užyvańniem fizičnaj siły.

Tamu ŭ zaviadzieńni kryminalnaj spravy jamu admovili, a samoha źbitaha sudzili za iłžyvy danos (č. 2 art. 400 KK). Toj vinu nie pryznaŭ. Ale 15 studzienia 2024 hoda sud Vaŭkavyskaha rajona vyrašyŭ pakarać jaho tryma hadami «chatniaj chimii».

Taksama mužčynu sudzili za zahadzia chłuślivaje paviedamleńnie, niepadparadkavańnie i abrazu (č.1 art. 19.6, art. 24.3, č. 1 art. 24.4 KaAP).

Abłasny sud pavieryŭ źbitamu

Rabočy abskardziŭ prysud. Jon prasiŭ admianić rašeńnie suda i nakiravać jaho na novaje rasśledavańnie.

Z novaha razhladu možna daviedacca, što pry dastaŭleńni ŭ izalatar mužčynu admovilisia prymać tudy z-za bačnych značnych cialesnych paškodžańniaŭ. Dvojčy jaho ahladali daktary — i vyrašyli špitalizavać. Toj ža śviedka-ŭčastkovy raskazaŭ, što pry vyvadzie z CRB rabočy admoviŭsia iści ŭ aŭtamabil. Da jaho ŭžyli siłu i śpiecsrodki — zahin ruki za śpinu i kajdanki. Ale siniakoŭ nie było vidać. Kali ž jon vychodziŭ z kamiery, na tvary byŭ siniak. Hetaha śviedku ŭ rajonnym sudzie nie apytali.

U admovie ŭ zaviadzieńni kryminalnaj spravy niama danych pra:

• krovapadciok u vobłaści levaha voka,
• traŭmatyčnuju pierfaracyju (paryŭ) barabannaj pieraponki,
• cialesnyja paškodžańni u vobłaści tvaru, hrudnoj kletki.

Što tyčycca videazapisaŭ z rehistrataraŭ, to pierapynki adbyvajucca mienavita ŭ toj čas, kali, pa słovach abvinavačanaha, jaho źbivali. Taksama na videazapisie z kamier vonkavaha nazirańnia vidać, jak da čałavieka, jaki znachodzicca na piarednim siadzieńni, prymianiajecca fizičnaja siła, čutnyja jahonyja kryki ab dapamozie.

«Hetyja abstaviny taksama zastalisia biez naležnaj uvahi suda pieršaj instancyi i naležnaj acenki nie atrymali», — daŭ vierdykt Hrodzienski abłasny sud. Da taho ž, nie dapytali śviedak źbićcia ź liku supracoŭnikaŭ izalatara. Abvinavačany nie byŭ aznajomleny pad podpis ab kryminalnaj adkaznaści pa art. 400 KK.

U vyniku rašeńnie suda admianili — jaho buduć razhladać znoŭku inšyja sudździ.

• 20
• 0
• 5
• 4
• 15
• 6
• 14
• 0