Viarchoŭny sud ZŠA vyrašyć, ci zmoža Tramp bałatavacca na pasadu prezidenta
Sprava budzie razhledžana ŭ lutym, rašeńnie budzie prymianiacca pa ŭsioj krainie.
Viarchoŭny sud ZŠA pahadziŭsia razhledzieć apielacyju Donalda Trampa na sudovaje rašeńnie, jakoje zabaraniaje byłomu prezidentu ŭdzielničać u respublikanskich prajmieryz u štacie Kałarada. Sprava budzie razhledžana ŭ lutym, rašeńnie budzie prymianiacca pa ŭsioj krainie, piša Bi-bi-si.
Pavodle rašeńnia Viarchoŭnaha suda Kałarada, Donald Tramp pavinien być vyklučany sa śpisu kandydataŭ na pieršasnych vybarach, jakija vyznačajuć pretendentaŭ na vyłučeńnie ŭ prezidenty ad partyi, z-za jaho roli ŭ biesparadkach 6 studzienia 2021 hoda.
Ź jurydyčnaha hledzišča pytańnie zaklučajecca ŭ tym, ci ŭžyvajecca ŭ dačynieńni da Trampa ŭniesienaja ŭ pieryjad Hramadzianskaj vajny ŭ ZŠA papraŭka da Kanstytucyi.
14-ja papraŭka da Kanstytucyi ZŠA zabaraniaje zajmać fiederalnyja pasady lubomu, chto «ŭdzielničaŭ u paŭstańni abo miaciažy», ale advakaty byłoha prezidenta nastojvajuć na tym, što heta nie adnosicca da Trampa.
Jaho advakaty śćviardžajuć: «rašeńnie Viarchoŭnaha suda Kałarada niekanstytucyjna pazbavić vybarčych pravoŭ miljony vybarščykaŭ u Kałarada i, vierahodna, budzie vykarystana ŭ jakaści šabłonu dla pazbaŭleńnia vybarčych pravoŭ dziasiatkaŭ miljonaŭ vybarščykaŭ pa ŭsioj krainie».
Respublikanskaja partyja Kałarada ŭžo pryhraziła naohuł admianić prajmieryz u štacie i zapuścić praces kokusaŭ, padčas jakich partyjcy śćviardžajuć svaju kandydaturu na naminacyju ŭ prezidenty bieź biuleteniaŭ, šlacham adkrytaha hałasavańnia na niefarmalnych sustrečach.
Rašeńnie Viarchoŭnaha suda Kałarada, pryniataje ŭ śniežni ź pieravahaj u čatyry suprać troch hałasoŭ, aznačaje saboj pieršy vypadak u historyi ZŠA, kali 14-ja papraŭka była vykarystanaja dla dyskvalifikacyi kandydata ŭ prezidenty.
Viarchoŭny sud ZŠA pryniaŭ skarhu Trampa da razhladu vielmi chutka — apielacyja była padadzienaja tolki ŭ sieradu. Sudździ taksama zajavili, što prymuć rašeńnie ŭ paskoranym paradku, sprečki pryznačanyja na 8 lutaha (zvyčajna razhlad spraŭ u Viarchoŭnym sudzie zajmaje ad 4 da 12 miesiacaŭ).
Takim čynam, vialikaja imaviernaść, što sud vyniesie rašeńnie da «Supieraŭtorka» ŭ sakaviku, kali ŭ Kałarada i mnohich inšych štatach projduć pieršasnyja vybary.
Prafiesar Ryčmandskaha ŭniviersiteta Karł Tobias nazvaŭ paskorany paradak dziejańniaŭ Viarchoŭnaha suda «pradkazalnym i abumoŭlenym rostam kolkaści pazovaŭ, padadzienych u roznych štatach va ŭsioj krainie».
Akramia Kałarada rašeńnie vyklučyć Trampa sa śpisu kandydataŭ na respublikanskich prajmieryz pryniała dziaržsakratar štata Men. Advakaty eks-prezidenta taksama źviarnulisia ŭ miascovy sud z apielacyjaj.
Sudy Miniesoty i Mičyhana adchilili sproby dyskvalifikavać Trampa. Inšyja spravy, uklučajučy Arehon, znachodziacca na razhladzie.
Mierkavanyja sproby Trampa padarvać vyniki prezidenckich vybaraŭ 2020 hoda znachodziacca ŭ centry ŭvahi sudovych pracesaŭ u Fiederalnym sudzie i sudzie štata Džordžyja, ale ni ŭ adnym vypadku jamu nie było pradjaŭlenaje kryminalnaje abvinavačvańnie ŭ padbuchtorvańni da paŭstańnia.
Donald Tramp źjaŭlajecca najbolš imaviernym kandydatam ad Respublikanskaj partyi na vybarach u listapadzie hetaha hoda.
Kamientary