U Breście pradali byłuju carskuju kazarmu. Cana na tarhach uźlacieła ŭ dzieviać tysiač razoŭ
U kancy listapada stała viadoma, što ŭ Breście adbuducca tarhi pa dvuch cikavych historyka-kulturnych abjektach: na aŭkcyjon vystaŭlalisia kazarmy. Abiedźvie — za simvaličnyja 37 rubloŭ. Učora łoty zdabyli ŭłaśnikaŭ, praŭda, zusim nie za adnu bazavuju.
Razmova pra efiektnuju carskuju kazarmu, raźmieščanuju na vulicy Bresckich dyvizij, 15a. Dvuchpaviarchovy budynak z čyrvonaj cehły byŭ uźviedzieny da 1917 hoda i moža pachvalicca nie tolki muram, ale i pamierami — 3333 «kvadraty».
Vystaŭlaŭsia na aŭkcyjon budynak i raniej. Naprykład, u 2022-m za jaho płanavali vyručyć bolš za 2,5 młn rubloŭ, adnak pry takich staŭkach achvotnych pazmahacca za łot nie znajšłosia. Zusim pa-inšamu razhortvalisia padziei hetym razam.
Jak raspavioŭ Onliner pradstaŭnik Biełaruskaj univiersalnaj tavarnaj biržy, paŭdzielničać u tarhach vyrašyli 15 zajaŭnikaŭ. Startavali ŭ 10:00 26 śniežnia, a skončyli tolki ŭ 01:55 27 śniežnia. Było zroblena 63 519 stavak. U vyniku kazarma dastałasia tamu, chto prapanavaŭ za jaje maksimalnuju sumu, a mienavita 352 564 rubli. Heta značyć cana na abjekt vyrasła ŭ 9,5 tysiačy razoŭ.
Raniej paviedamlałasia, što na płoščach, jakija ŭžo pieražyli častkovuju pierapłaniroŭku, zamienu pieraharodak i ŭstanoŭku novych voknaŭ, možna adkryć ofisy, muziej, studyi.
— Pradali i jašče adnu histaryčnuju kaštoŭnaść — abarončuju kazarmu «Ž-Z». Heta častka Bresckaj krepaści. Tarhi vynikovyja: pačatkovaja cana była 37 rubloŭ, a cana prodažu — 5516. U tarhach uziali ŭdzieł čatyry zajaŭniki, jakija za 28 chvilin zrabili 988 stavak. U abodvuch vypadkach pieramožcami stali jurydyčnyja asoby, jakija pracujuć u śfiery budaŭnictva, — rastłumačyli ŭ BUTB.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary