Kitajski elektramabil prajechaŭ bolš za 1000 km ad adnoj zaradki batarei
Masavaja vytvorčaść novaha akumulatara pačniecca ŭ krasaviku 2024 hoda.
Elektramabil kitajskaha vytvorcy Nio nieŭzabavie pastupić u prodaž z «paŭćviordym» akumulataram mahutnaściu 150 kVt·hadz (faktyčna mohuć być vykarystanyja 140 kVt·hadz). Takaja mahutnaść źjaŭlajecca najvialikšaj siarod usich lehkavych aŭtamabilaŭ, paviedamlaje Car News China. Kab prademanstravać vialiki zapas chodu, hienieralny dyrektar Nio Uiljam Li prajechaŭ na pratatypie ET7 1044 km za 14 hadzin — dystancyja, jakaja pierasiahnuła mnohija aŭtamabili z hazavym ruchavikom.
Test pravodziŭsia pry adnosna nizkich tempieraturach (ad -2 da 12 ℃) i tranślavaŭsia ŭ žyvym efiry. Kiravańnie rabiłasia ŭ asnoŭnym u paŭaŭtanomnym režymie (abo Navigate-on-Pilot+, jak heta nazyvaje Nio) i z abmiežavańniem chutkaści da 90 km/h. Siaredniaja chutkaść skłała 83,9 km/h, poŭny čas u darozie biez uliku prypynkaŭ skłaŭ 12,4 hadziny.
Faktyčna akumulatar mahutnaściu 150 kVt·hadz budzie dastupny tolki asobna ad aŭtamabila (heta praktykujecca ź niekatorymi kitajskimi aŭtamabilami, jakija pradajucca ŭ Jeŭropie). Raniej kampanija zajaŭlała, što adzin tolki akumulatar budzie kaštavać stolki ž, kolki ŭvieś aŭtamabil ET5 EV pačatkovaha ŭzroŭniu — kala 42 000 dalaraŭ.
Nio — vytvorca luksavych elektramabilaŭ u Kitai, jaki prapanuje mašyny biez batarei, dazvalajučy aformić štomiesiačnuju padpisku na akumulatar jak pasłuhu. Hetaja pasłuha taksama dazvalaje vam u luby momant zamianić batareju na bolš mahutnuju.
Akumulatar vyrableny kampanijaj WeLion New Energy Technology, paviedamlaje Engaget. U paŭćviordych batarejach vykarystoŭvajucca hielevyja, hlinistyja abo palimiernyja elektrality, jakija zabiaśpiečvajuć bolšuju ščylnaść enierhii i vohnieŭstojlivaść, čym sučasnyja batarei. Tym nie mienš jany ŭsio jašče dalokija ad paŭnavartasnych ćviordacielnych akumulataraŭ, jakija mahli b padvoić ščylnaść enierhii.
Ciapier čytajuć
«Vy pryjšli siudy łochami, a staniecie drapiežnikami». Jak pracujuć minskija koł-centry skamieraŭ3
Kamientary