«Tady ŭ vas nie budzie hazu». Małdova śćviardžaje, što Rasija nazvała sumu doŭhu, uziaŭšy ličby sa stoli
Prezident Maja Sandu anansavała vysnovy aŭdytarskaj kampanii. U 2021 hodzie «Małdovahaz» zaklučyŭ novuju damovu z «Hazpramam» pry ŭmovie vypłaty doŭhu. RF acaniła doŭh jaho ŭ 709 miljonaŭ, Małdova — u 590,8 miljona dalaraŭ.
Naniataja ŭradam Małdovy mižnarodnaja aŭdytarskaja kampanija nie vyjaviła doŭhu respubliki za haz pierad rasijskim «Hazpramam» u pamiery 800 młn dalaraŭ, zajaviła prezident krainy Maja Sandu na sustrečy z pradstaŭnicami «Žanočaj asacyjacyi» Hahauzii ŭ niadzielu, jak piša Deutsche Welle.
«Na nastupnym tydni naš urad vyjdzie i skaža, što my naniali mižnarodnuju kampaniju, jakaja zrabiła aŭdyt i skazała, što ŭ nas niama nijakich daŭhoŭ [pierad «Hazpramam»] u 800 młn dalaraŭ. Rasijskija pierahavorščyki chacieli chutka padmanuć», — skazała Sandu.
Pavodle jaje słoŭ, rasijskaja kampanija pierad zaklučeńniem novaha kantrakta vystaviła ŭmovu: za čatyry hady vypłacić doŭh 800 młn dalaraŭ.
«My skazali, što nie možam hetaha padpisać, bo heta žudasna vialikija hrošy, i my nie možam na takoje padpisacca. Nam skazali: «U vas nie budzie hazu», — raspaviała prezident.
U 2021 hodzie kampanija «Małdovahaz» pierazaklučyła damovu na pastaŭki hazu z Rasii da 2026 hoda pry ŭmovie vypłaty doŭhu. «Hazpram» śćviardžaŭ, što jaho suma 709 młn dalaraŭ. Padlikovaja pałata Małdovy zajaviła, što doŭh składaje 590,8 młn dalaraŭ. Suma 800 młn dalaraŭ raniej nie nazyvałasia.
Aŭdytary z Narviehii i Vialikabrytanii na zamovu ŭrada krainy pavinny byli acanić doŭh respubliki za 30 hadoŭ. U lipieni ministr enierhietyki Małdovy Viktar Parlikaŭ zajaviŭ, što spravazdača ab źniešnim aŭdycie zapazyčanaści «Małdovahaz» budzie ŭ najbližejšy čas nakiravanaja ŭ «Hazpram».
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary