«U łahiery nie chaciełasia ni spać, ni jeści». Byłoha biełaruskaha pamiežnika, jakoha ŭ Litvie pryznali niebiaśpiečnym, pieradali Polščy

Sa słoŭ Ivana Straškieviča, jašče tydzień tamu da jaho pryjšli pradstaŭniki mihracyjnaj słužby i paviedamili, što atrymali adkaz ad polskich kalehaŭ — tyja paćvierdzili, što hatovyja pryniać i razhladać jahonuju spravu.

2 žniŭnia Ivana pavodle Dublinskaha pahadnieńnia pieradali ŭ Polšču. Zhodna z hetym dakumientam, u pryvatnaści, adkaznaść za nadańnie prytułku niasie taja kraina ES, u jakuju biełarus zajechaŭ pieršapačatkova, abo jakaja vydała jamu vizu.

«Jašče ŭ litoŭskim łahiery chacieli, kab ja padpisaŭ papiery, što admaŭlajusia ad abskardžańnia pastanovy pryznać mianie niebiaśpiečnym. Matyvavali heta tym, što tak chutčej pryjdzie adkaz z Polščy, ale ja admoviŭsia. U vyniku mianie siońnia padniali a piataj ranicy, a a dziaviataj pasadzili na samalot», — tłumačyć mužčyna.

Praz hadzinu Straškievič prylacieŭ u Varšavu, tam jaho sustreli pradstaŭniki miascovaj mihracyjnaj słužby. U Polščy biełarus adrazu padaŭsia na palityčny prytułak. Paśla jamu treba było adznačycca ŭ łahiery dla biežancaŭ, ale zastavacca tam chłopcu nie pryjšłosia — jon viarnuŭsia ŭ Biełastok, dzie čatyry hady žyŭ da pierajezdu ŭ Litvu.

«Mnie addali telefon i kampjutar, ja zmoh sabrać niejkuju vopratku na pieršy čas z saboj, uziaŭ krychu ježy. Ale ŭ Litvie ŭ mianie zastałasia mašyna i vielmi šmat rečaŭ. I ja sam ich zabrać nie mahu — ale mnie skazali, što heta maje prablemy. Pryjdziecca svajakam pieravozić».

U Straškieviča pakul jašče dziejničaje zabarona na ŭjezd u Litvu na piać hadoŭ. Biełarus čakaje adkaz pa skarzie, jakuju padaŭ na hetaje rašeńnie paśla svajho zatrymańnia ŭ červieni. Ale ciapier, upeŭnieny jon, jamu ŭžo nie pahražaje departacyja na radzimu.

«Nasamreč ja rady — chacia b ciapier na voli. Sa mnoj tam navat nie pasprabavali pahavaryć, vyśvietlić niešta, dać mnie patłumačyć abstaviny — prosta asudzili i zakryli, — emacyjna padzialiŭsia surazmoŭca. —

Uvieś hety čas u łahiery było niervova: spać nie chaciełasia, jeści taksama. Da mianie mahli pryjazdžać rodnyja, siabry, usie padtrymlivali, cikavilisia jak majusia. Ciapier ja zastajusia ŭ Polščy, inšaha vyjścia niama. U Litvu ŭžo dakładna nie pajedu, ale rady, što dla mianie ŭžo niama pahrozy departacyi».

Ivanu Straškieviču 29 hadoŭ. Naradziŭsia ŭ miastečku Kreva Smarhonskaha rajona. Dva hady adsłužyŭ u vojsku ŭ pavietrana-desantnaj bryhadzie ŭ Bieraści. Potym pierajšoŭ na kantrakt u pamiežnyja vojski. Tam słužyŭ jašče 3,5 hoda ŭ adździele padvyšanaj bajavoj hatoŭnaści ŭ Smarhoni. 

Zvolniŭsia Straškievič u 2019 hodzie, bo jamu nie padabałasia, jak adbyvajecca kiravańnie Uzbrojenymi siłami. Tady ž źjechaŭ u Polšču i pražyŭ tam try hady. Atrymaŭ polski dazvoł na žycharstva.

Apošni raz jon pryjazdžaŭ u Biełaruś na pačatku 2020 hoda. Potym, sa słoŭ Straškieviča, jaho pačali pieraśledavać za palityčnuju pazicyju. Baćkam nazyvali niekalki kryminalnych artykułaŭ na syna, u tym liku «raspalvańnie varožaści», bo paśla prezidenckich vybaraŭ 2020-ha jon vychodziŭ na akcyi pratestu.

U 2022-m Straškievič vyrašyŭ pierabracca ŭ Litvu da rodnych, uładkavaŭsia na pracu da brata. U jaho była pracoŭnaja viza. Kali jaje termin staŭ padychodzić da kanca, biełarus padaŭ dakumienty na padaŭžeńnie vizy i atrymańnie miascovaha DNŽ. Praz try miesiacy jamu pryjšli admovy praź jahonuju słužbu ŭ biełaruskim DPK.

«Na asnovie hetych źviestak mianie pryznali niebiaśpiečnym dla Litvy — było paznačana, što ja łajalny da režymu, mahu być špijonam. Pastavili zabaronu na ŭjezd na piać hadoŭ», — raspaviadaŭ raniej «Lusterku» Ivan.

14 červienia ŭ jaho było pryznačanaje intervju na atrymańnie palityčnaha prytułku, u toj ža dzień biełarusa zatrymali i źmiaścili ŭ łahier dla ŭciekačoŭ u Pabrodzie. Jon raspaviadaŭ, što jamu pahražali departacyjaj u Biełaruś, niahledziačy na toje, što tam jamu pahražaje termin.

• 3
• 0
• 3
• 2
• 0
• 2
• 11
• 0