Kanada, Biełaruś i Rasija zdabyvali lvinuju dolu kalijnych uhnajeńniaŭ u śviecie. Zaraz da ich maje dałučycca Habon, radovišča tam hihanckaje, i raspracoŭvać jaho buduć kanadcy.
Kanadskaja hornazdabyŭnaja kampanija Millennial Potash nabyła afrykanski kalijny prajekt Banio, jaki raspracoŭvaje adno z najbujniejšych u śviecie radoviščaŭ kaliju. Pra heta 9 maja paviedamiła navinnaja słužba Accesswire.
Prajekt Banio achoplivaje 1238 kvadratnych kiłamietraŭ terytoryi Habona, na jakoj źmiaščajecca 1,7 miljarda ton kalijnych pryrodnych solaŭ, jakija adpaviadajuć mižnarodnym standartam jakaści.
Hetaje vielizarnaje radovišča maje stratehična zručnaje raźmiaščeńnie na ŭźbiarežžy Atłantyčnaha akijana, što patańniaje i spraščaje dastaŭku kaliju suśvietnym spažyŭcam. Akramia hetaha, na terytoryjach radovišča ŭžo jość nieabchodnaja infrastruktura dla zdabyčy kalijnych uhnajeńniaŭ.
«Dziakujučy pakupcy Banio, kanadskaja kampanija Millennial Potash zmoža stać najbujniejšym hulcom na suśvietnym kalijnym rynku i zabiaśpiečyć nadziejnuju krynicu kaliju dla krain pa ŭsim śviecie. Heta maje asablivaje značeńnie va ŭmovach zamiaščeńnia pastavak ź Biełarusi i Rasii», — piša Accesswire.
Jak zaznačaje słužba, Kanada — pieršaja ŭ śviecie kraina pa zdabyčy i eksparcie kalijnych uhnajeńniaŭ — nie zmahła ŭ naležnaj stupieni zapoŭnić prabieł u pastaŭkach kaliju ź Biełarusi i Rasii, jakija trapili pad sankcyi z-za vajny va Ukrainie.
Heta pryviało da deficytu kalijnych solaŭ i rezkaha rostu cen na ich, što taksama stanovicca pryčynaj łabiravańnia ŭ niekatorych zachodnich kołach źniaćcia sankcyj z kalijnaj haliny Biełarusi i cisku na asobnyja krainy z metaj dazvolić tranzit biełaruskich uhnajeńniaŭ praź ich terytoryi na suśvietny rynak.
Tamu kupla prajekta Banio u Habonie źjaŭlajecca svoječasovaj i ŭnikalnaj mahčymaściu dla Kanady i krain Zachadu zadavolić suśvietnyja patreby ŭ kalii ŭ abychod Biełarusi i Rasii, padkreślivaje Accesswire.
«I zajmiom svajo miesca pačesnaje ŭ hetym miry». Łukašenka zahadaŭ viertykalščykam zabycca pra sankcyi i pierajšoŭ na trasianku
Polski dypłamat: My chočam novych sankcyj suprać Biełarusi, ale nie koštam skasavańnia raniej pryniatych
Jeŭrasajuz prydumlaje, jak uździejničać na krainy, što dapamahajuć abychodzić sankcyi
Kamientary