Kala traciny maładych ludziej ad 18 da 25 hadoŭ kažuć, što vierać u isnavańnie «niejkaj najvyšejšaj siły», pakazała niadaŭniaje apytańnie ŭ ZŠA. Dva hady tamu takich maładych ludziej było tolki čverć.
27-hadovy Desmand Adel apisvaje siabie jak «teista-ahnostyka» — čałavieka, jaki vieryć u adnaho ci niekalkich bahoŭ, adnak nie viedaje dakładna, ci isnujuć jany. U dziacinstvie jon naviedvaŭ carkvu kožnuju niadzielu, ale nie pamiataje, da «jakoj haliny chryścijanstva» jana naležała, a ŭ padletkavyja hady chadzić tudy kinuŭ, raskazvaje WSJ.
«Ja nie dumaju, što hetaja najvyšejšaja siła padobnaja da jakich-niebudź bahoŭ, što apisany asnoŭnymi relihijami», — kaža chłopiec.
Pavodle niadaŭniaha apytańnia maładych ludziej u ZŠA, praviedzienaha niekamiercyjnaj arhanizacyjaj Springtide Research Institute, kala traciny apytanych ad 18 da 25 hadoŭ kažuć, što vierać u isnavańnie najvyšejšaj siły. U 2021 hodzie takich maładych ludziej było čverć.
U apytańni Springtide vykarystoŭvaŭsia termin «najvyšejšaja siła», pad jakoj moža razumiecca Boh, ale nie abmiežavany chryścijanskaj kancepcyjaj ci kankretnaj relihijaj. Mnohija maładyja ludzi kažuć, što jany nie abaviazkova vierać u Boha, pakazanaha na ikonach abo apisanaha ŭ Biblii. Pry hetym jany miarkujuć, što isnuje niejkaje najvyšejšaje litaścivaje bažastvo.
Kaniec niepieramožnaści
Čamu ž źjaviłasia takaja patreba ŭ «abstraktnych najvyšejšych siłach»?
Sami maładyja ludzi, a taksama bahasłovy tłumačać hety rost patrebaj vieryć u niešta bolšaje, čym ty sam, — asabliva paśla troch hadoŭ strat, jakija pačalisia razam z pandemijaj.
Dla mnohich maładych ludziej pandemija stała pieršym surjoznym kryzisam u žyćci, ź jakim jany sutyknulisia. U toj ci inšaj stupieni heta zakranuła kožnaha — niechta straciŭ siamju ci siabroŭ, a niechta — upeŭnienaść u pracy i paŭsiadzionnym žyćci. U šmatlikich sensach heta sastaryła maładych amierykancaŭ, i zaraz jany źviartajucca da taho ž suciašeńnia, da jakoha źviartalisia papiarednija pakaleńni padčas trahiedyj — dla taho, kab acaleć i suciešycca.
Siarod inšych pryčyn zvarotu da transcendencyi — rost varožaści pamiž roznymi sacyjalnymi hrupami (naprykład, rasavami), strach straty pracy i roznyja ekanamičnyja prablemy. Usie hetyja źjavy sarvali tyja achoŭnyja płasty, jakija moładź da peŭnaha času adčuvała vakoł siabie. Maładyja ludzi bolš nie adčuvajuć siabie niepieramožnymi i šukajuć abarony.
Mnohija dałučajucca da carkoŭnych supolnaściaŭ, kab u tym liku naviedvać roznyja imprezy abo zaniatki sportam ci turystyčnyja pachody. Takim čynam moładź vyrašaje dla siabie pytańnie sacyjalnych i duchoŭnych suviaziaŭ.
26-hadovaja Kortni Fartynh, jakaja pracuje ŭ słužbie padtrymki klijentaŭ u koł-centry, kaža, što ŭ dziacinstvie naviedvała baptysckija i piacidziasiatnickija cerkvy, ale ŭ padletkavyja hady pačała sumniavacca ŭ viery. Siońnia jana ličyć siabie chryścijankaj i kaža, što vybiraje vieryć.
«Kali b ja pačała sumniavacca ci dumać, što Boha niama, heta adpraviła b mianie ŭ śpiral pytańniaŭ «A što, kali b?» — pytańniaŭ, u jakija ja addaju pieravahu nie ŭnikać».
Ale ci stali maładyja bolš relihijnymi?
Nie zusim. Inšyja apytańni, u tym liku apytańnie Gallup, jakija zadavali pytańnie kankretna pra vieru ŭ Boha, a nie ŭ najvyšejšyja siły, pa-raniejšamu pakazvajuć źnižeńnie cikavaści maładych ludziej da relihii.
Apytańnie Wall Street Journal-NORC, apublikavanaje ŭ minułym miesiacy, pakazała, što tolki 31% maładych amierykancaŭ ad 18 da 29 hadoŭ zajavili, što relihija dla ich vielmi važnaja. Heta samy nizki pracent siarod usich darosłych uzrostavych hrup. Daśledavańnie Pew Research Center, taksama apublikavanaje ŭ minułym miesiacy, pakazała, što tolki 20% maładych ludziej ad 18 da 29 hadoŭ naviedvajuć relihijnyja słužby štomiesiac ci čaściej — u paraŭnańni z 24% u 2019 hodzie.
Akramia hetaha, mnohija chłopcy i dziaŭčyny kažuć, što nie zusim zhodnyja z relihijaj pa takich pytańniach, jak rasavaja spraviadlivaść, hiendarnaja roŭnaść i imihracyjnyja pravy. I što viera ŭ Boha ci najvyšejšyja siły nie abaviazkova aznačaje naviedvańnie carkvy ci relihijnuju prynaležnaść.
Čytajcie jašče:
Pravasłaŭnych u Biełarusi bolš, čym tych, chto vieryć u Boha?
«Mianie bolš nie vyviartaje». Jak biełarusy źmianili svajo staŭleńnie da carkvy paśla 2020-ha
«Možna prosta piačy bułki». Vysokapastaŭleny vykanaŭca represij uvieravaŭ u Boha i syšoŭ ź milicyi
Ciapier čytajuć
«Ja suprać. Movy, jakija pakinuli paśla siabie kałanizatary ŭ Afrycy, stali šlacham da cyvilizacyi». Aleksijevič adkazała, jak stavicca da admovy ad ruskaj movy va Ukrainie6060
«Ja suprać. Movy, jakija pakinuli paśla siabie kałanizatary ŭ Afrycy, stali šlacham da cyvilizacyi». Aleksijevič adkazała, jak stavicca da admovy ad ruskaj movy va Ukrainie60
«U turmie ja lubiŭ vynosić śmiećcie». Historyja Mandeły, jaki razumieŭ, što niemahčyma zamanić voraha ŭ zasadu, kali nie viedaješ, jak myślać jaho hienierały88
«U turmie ja lubiŭ vynosić śmiećcie». Historyja Mandeły, jaki razumieŭ, što niemahčyma zamanić voraha ŭ zasadu, kali nie viedaješ, jak myślać jaho hienierały8
«Jak Volski prychodziŭ ź pieratrusam da Kołasa, a Krapiva i Hlebka danosili na kaleh». Apublikavanyja žachlivyja ŭspaminy Ryhora Biarozkina pra represii 1920—1940-ch1717
Kamientary