Historyja Brendana Frejziera: jak zorka «Mumii» źnik z kino praz depresiju, a ciapier uziaŭ «Oskar»
Cyrymonija ŭručeńnia «Oskara» stała tryumfalnaj dla 54-hadovaha Brendana Frejziera. Akcior, čyju karjeru niekali razburyli depresija i inšyja chvaroby, atrymaŭ hałoŭnuju kinaŭznaharodu za rolu ŭ «Kicie» ad režysiora Darena Aranofski.
Ad zornaj karjery da zabyćcia
U stužcy, jakaja pryviała Frejziera da «Oskara», jon uvasobiŭ Čarli — vykładčyka litaratury z vahaj pad 300 kiłahramaŭ, jaki ŭ apošnija svaje dni sprabuje adnavić adnosiny z dačkoj, jakuju jon niekali pakinuŭ. Čarli syšoŭ ź siamji, kab być razam sa svaim studentam, ale toj, kachańnie jaho žyćcia, trapiŭ u siektu i zahinuŭ. Adzinota i bol — voś usio, što składaje žyćcio hetaha masiŭnaha mužčyny, jaki ŭnutry akazvajecca dalikatnym i nieabyjakavym da ludziej, jaki navat paśla ŭsiaho pieražytaha ŭpeŭnieny, što ludzi — nievierahodnyja.
Samoha Frejziera taksama nazyvajuć ščyrym i dobrym čałaviekam, jaki narešcie atrymaŭ całkam zasłužanuju im uznaharodu. Jaho šlach u kino pačaŭsia jašče ŭ 1988 hodzie ŭ kryminalnym sieryjale America's Most Wanted, dzie małady Brendan syhraŭ siabra achviary zabojstva.
Jaho 90-ja poŭnyja rolaŭ u kamiedyjnych i pryhodnickich filmach: zhadajem «Pustyja hałovy», «Džordža z džunhlaŭ» i hałoŭny da «Kita» film Frejziera — pryhodnickuju «Mumiju».
Paralelna z hetym Brendan zdymaŭsia i ŭ bolš surjoznych stužkach, dzie hraŭ dramatyčnyja roli. Adznačym film «Bohi i monstry» 1998 hoda — bijahrafičnuju dramu pra stvaralnika stužak pra Frankienštejna Džejmsa Ueła, dzie Frejzier syhraŭ jaho sadoŭnika i siabra. «Bohi i monstry» atrymaŭ «Oskar» za najlepšy adaptavany scenar, ale karcina tak i nie pierałamała imidž Brendana jak niesurjoznaha akciora.
U nulavyja akcior praciahnuŭ zdymacca — akramia inšych stužak, u jaho filmahrafii źjavilisia druhaja i treciaja častki «Mumii». Paśla apošniaj ź ich, u 2009-2010 hadach, Frejzier amal źnikaje z ekranaŭ. Nastupnyja hady jon budzie zdymacca tolki ŭ adzinkavych filmach: jak paźniej patłumačyć akcior, pierapynak źviazany ź siamiejnymi prablemami i zdaroŭjem.
U 2007 hodzie Brendan raźvioŭsia z aktrysaj Eftan Śmit, maci jaho traich dziaciej, i ŭ nastupnyja vosiem hadoŭ pieranios niekalki apieracyj — vydaleńnie častki pazvanka, apieracyju na pajaśnicy, častkovuju zamienu kalennaha sustava, adnaŭleńnie hałasavych źviazak i inšyja manipulacyi. Usio praz toje, što šmatlikija truki ŭ svaich karcinach Frejzier vykonvaŭ sam, i časam heta pryvodziła da traŭmaŭ, jakija ŭsio nakoplivalisia.
Taksama akcior raspavioŭ, što staŭ achviaraj seksualnych damahańniaŭ. Usio adbyłasia ŭ 2003 hodzie na zvanym abiedzie Halivudskaj asacyjacyi zamiežnaj presy, jakaja prysudžaje kinapremiju «Załaty hłobus». Kiraŭnik arhanizacyi Filip Bierk schapiŭ Frejziera za jahadzicy i dakranuŭsia da pachviny, i hetaja historyja mocna traŭmavała akciora. Brendan raskazvaŭ, što toj incydent prymusiŭ jaho sumniavacca ŭ svajoj dziejnaści, i na niejki čas akcior uvohule dumaŭ syści z kinaindustryi. Hetaja historyja, razvod z žonkaj i śmierć maci — rečy, što vyklikali ŭ Frejziera depresiju i prymusili jaho časova zabyć pra paŭnavartasnuju karjeru. Mierkavana, paŭpłyvała i svarka z upłyvovym Filipam Bierkam, bo zvankoŭ z prapanovami zdymak stała našmat mienš.
Znajści svajho režysiora
Ale ŭ 2015 hodzie akcior pačaŭ pastupovaje viartańnie. Rola za rolaj jon dakazvaŭ sabie i inšym, što jašče čahości varty: voś rola rejndžera ŭ piaci sieryjach vesterna «Paŭstańnie Techasa», a voś udzieł u šaści sieryjach chitovaha šou «Kachanki». Praz dva hady Frejzier atrymaŭ rolu druhoha płanu ŭ sieryjale «Trast», a potym — adnu z hałoŭnych rolaŭ u sieryjale «Fatalny patrul».
U 2021 hodzie pierasiaklisia šlachi Frejziera i režysiora Darena Aranofski. Vy mahli čuć pra apošniaha, naprykład, pa jaho stužcy «Čornaja lebiedź», jakaja pryniesła aktrysie Natali Portman «Oskar» za najlepšuju žanočuju rolu, ci pa karcinie «Restler» ź Miki Rurkam, za jakuju toj atrymaŭ naminacyju na «Oskar». Karaciej, Aranofski jaŭna ŭmieje pracavać z akciorami, i ich tandem z Frejzieram skłaŭsia jak nielha lepiej.
Brendanu dastałasia rola, u jakoj nie tak šmat mahčymaściej pakazać siabie: kab stvaryć vobraz 270-kiłahramovaha Čarli, na Frejziera nadziavali nakładny tors vahaj ad 22 da 136 kiłahramaŭ. Zastavałasia hrać chiba što vačami, hołasam dy niešmatlikimi ruchami — i piersanaž atrymaŭsia taki, jaki trymaje hledača ceły film, jakomu vieryš i spačuvaješ.
«Kita» ŭpieršyniu pakazali na Vieniecyjanskim kinafiestyvali 5 vieraśnia 2022 hoda. Kali prajšli finalnyja tytry, hledačy zładzili Frejzieru avacyi daŭžynioj šeść chvilin — i akcior zapłakaŭ. Mała chto sumniavaŭsia ŭ tym, što sioletni «Oskar» dastaniecca jamu, jak i ŭ tym, što hetaja statuetka zasłužanaja. Zastajecca tolki, kab u hety raz Frejzier i kinaindustryja narešcie nie ŭpuścili adno adnaho, bo bieź jaho śviet kino šmat stracić.
«Naša Niva» — bastyjon biełaruščyny
PADTRYMAĆ
Kamientary