Što adbyvajecca na zapoŭnienym technikaj palihonie «Lepielski». Zdymak sa spadarožnika
Z dapamohaj spadarožnikavaha servisu Planet Labs radyjo «Svaboda» ŭdałosia atrymać jakasny zdymak taho, što adbyvajecca na vajskovym palihonie «Lepielski» ŭ Viciebskaj vobłaści.
Aktyŭnaść vajskoŭcaŭ na asnoŭnych biełaruskich palihonach zastajecca da hetaj pary davoli vysokaja. Palihon «Lepielski» — adzin ź pieršych, na jaki pačali prybyvać, prykładna z 18 kastryčnika 2022 hoda, ešałony z rasijskaj technikaj i vajskoŭcami paśla abviaščeńnia sumiesnych vučeńniaŭ tak zvanaj rehijanalnaj hrupoŭki vojskaŭ Biełarusi i Rasii.
Na 12 studzienia 2023 hoda na palihon usio jašče praciahvali prybyvać rasijskija vajskoŭcy. Pry hetym adbyvajecca pastajannaja pravierka 19-j hvardziejskaj asobnaj miechanizavanaj bryhady, što raźmiaščajecca ŭ vioscy Zasłonava pry palihonie. Naprykład, 9 studzienia 2023 hoda tankavy bataljon bryhady pačaŭ marš-kidok da 227-ha ahulnavajskovaha palihona pad Barysavam. Da hetaha 13—18 śniežnia była praviedziena pravierka hatoŭnaści dziažurnych siłaŭ hetaj ža bryhady.
Na palihonie vidać bahata techniki, siarod jakoj možna zaŭvažyć, imavierna, KamAZy, tanki i BMP. Ahulnaja kolkaść techniki — nie mienš jak 150 adzinak. Z uschodniaha i zachodniaha bakoŭ možna pabačyć dva palavyja łahiery prykładna na 14 i 30 namiotaŭ, kožny namiot prykładna 10 na 5 mietraŭ.
Na poŭnač ad palihona — čyhunačnaja stancyja Zasłonava, ad jaje praz vajskovy haradok i les idzie daroha prosta da palihona.
Na čyhunačnaj stancyi vidać dva ešałony z vahonami i płatformami dla pahruzki techniki. Pa cieniach, jakija adkidaje hetaja technika, možam mierkavać, što heta ŭ asnoŭnym tanki ci BMP, taksama prysutničajuć hruzavyja mašyny.
Na spadarožnikavym zdymku vidać, što na bazie zachoŭvańnia techniki častka jaje vyviedziena z haražoŭ. Dla paraŭnańnia — zdymak, zrobleny ŭ pieryjad z 13 pa 18 śniežnia 2022 hoda. Bačna, što hetyja haražy vykarystoŭvajucca dla zachoŭvańnia bajavych mašyn piachoty. Mierkavana, na zdymku mienavita jany.
Pavodle apošniaha paviedamleńnia ekśpiertaŭ amierykanskaha Instytuta vyvučeńnia vajny (ISW), «płan rasijskaha nastupu na poŭnač Ukrainy ciapier zastajecca małaimaviernym». Prytym ekśpierty pryznajuć, što «Kreml zabiaśpiečvaje hnutkaść płanavańnia». Choć Maskva i «pašyraje rasijskuju vajskovuju prysutnaść u Biełarusi», ISW miarkuje, što dadatkovyja siły nakiroŭvajucca na biełaruskuju terytoryju «tolki ŭ ramkach vučeńniaŭ». «Na hety momant niama nijakich dokazaŭ taho, što Rasija stvaryła ŭ Biełarusi struktury kamandavańnia i kiravańnia, nieabchodnyja dla apieratyŭnaj udarnaj hrupy», — kanstatavali analityki.
Na minułym tydni stała viadoma, što ŭ Biełaruś prybyła kamisija Minabarony RF na čale z hałoŭnakamandujučym Suchaputnymi vojskami Aleham Salukovym.
Byli prainśpiektavanyja voinskija čaści i padraździaleńni rasijskaha kampanienta tak zvanaj rehijanalnaj hrupoŭki vojskaŭ.
Kamientary