Kulturna-zabaŭlalnyja mierapryjemstvy ciapier buduć arhanizoŭvać pa rejestru
Vydadzienaja pastanova Savieta Ministraŭ, jakaja praduhledžvaje farmavańnie rejestra arhanizataraŭ kulturna-zabaŭlalnych mierapryjemstvaŭ, paviedamlaje BiełTA. Pastanova ŭstupaje ŭ siłu z dnia apublikavańnia.
Pastanova Savieta Ministraŭ adnosna rejestra pryniataja 22 červienia 2022 hoda pad numaram 401. Składać i vieści rejestr, pavodle jaje, budzie Ministerstva kultury abo ŭpaŭnavažanaja im jurydyčnaja asoba. Dekłarujecca, što infarmacyja ŭ rejestry pavinna być poŭnaj i dakładnaj, adkrytaj i dastupnaj dla ŭsich.
U rejestry buduć raźmieščanyja źviestki ab arhanizatarach ź liku IP, jurydyčnych asob (akramia dziaržorhanaŭ, dziaržarhanizacyj i arhanizacyj, u statutnych fondach jakich 50 pracentaŭ i bolš akcyj (dolaŭ) znachodzicca va ŭłasnaści Biełarusi abo jaje administracyjna-terytaryjalnych adzinak), a taksama zamiežnych abo mižnarodnych arhanizacyj, u tym liku jakija nie źjaŭlajucca jurydyčnymi asobami.
Dla ŭklučeńnia ŭ rejestr arhanizataru treba nakiravać zajavu ŭ Ministerstva i šerah dakumientaŭ. Dakumienty razhledzić respublikanskaja ekśpiertnaja kamisija pry Minkultury.
Dekłarujecca, što kamisija pavinna ŭličvać mastacki ŭzrovień kulturna-zabaŭlalnych mierapryjemstvaŭ, praviedzienych arhanizataram. Ale taksama jana «źviernie asablivuju ŭvahu na najaŭnaść faktaŭ admieny mierapryjemstvaŭ biez uvažlivych pryčyn, ich praviadzieńnia z parušeńniem patrabavańniaŭ Kodeksa ab kultury, inšych aktaŭ zakanadaŭstva, parušeńnia terminaŭ vypłaty hrašovaj kampiensacyi koštu ŭvachodnaha bileta, jaho niavypłaty abo vypłaty ŭ niapoŭnym pamiery».
Arhanizatary, jakija padlahajuć uklučeńniu ŭ rejestr, ale nie ŭklučanyja ŭ jaho, nie zmohuć pravodzić kulturna-zabaŭlalnyja mierapryjemstvy.
Hetaja norma nie datyčycca mierapryjemstvaŭ, paśviedčańnie na prava arhanizacyi i praviadzieńnia jakich na terytoryi Biełarusi vydadziena da 1 žniŭnia 2022 hoda.
Nie vypadaje asabliva sumniavacca, što rejestr budzie vykarystoŭvacca pieradusim dla taho, kab nibyta na zakonnych padstavach źvieści lehalnaje kulturnaje žyćcio krainy da mierapryjemstvaŭ, arhanizavanych dziaržavaj i afilijavanymi ź joj arhanizacyjami.
Ciapier čytajuć
Bieśpiłotnik, jaki ŭpaŭ u Minsku, prylacieŭ z boku Barysava — šmatlikija śviedčańni9
Kamientary