Sacyjołahi daviedalisia, što buduć rabić biełarusy, kali vajna raspaŭsiudzicca na našu krainu
Shatham House apublikavaŭ vyniki novaha sacyjałahičnaha daśledavańnia nakont staŭleńnia biełarusaŭ da vajny. Jak źmianilisia nastroi i simpatyi?
Apytańnie pravodziłasia ŭ Biełarusi ŭ krasaviku — praź internet byli apytanyja 823 respandenty.
Siarod ich 40% nie padtrymlivajuć dziejańni rasijskaj armii na terytoryi Ukrainy, a 32% — u toj ci inšaj stupieni padtrymlivajuć.
Pry hetym mienš za 20% respandentaŭ čakajuć, što nastupstvy vajny va Ukrainie dla Biełarusi i dla ich asabista buduć stanoŭčymi, pałova apytanych rychtujecca da niehatyŭnych nastupstvaŭ.
U paraŭnańni z anałahičnym daśledavańniem Chatham Hause, praviedzienym u sakaviku, biełarusy pačali radziej ličyć, što kanflikt budzie niepraciahłym — 53% miarkujuć, što vajna jašče na niekalki miesiacaŭ. Jašče 18% ličać, što kanflikt raściahniecca na hady.
Biełarusy ŭ pierśpiektyvie bližejšych troch miesiacaŭ čakajuć paharšeńnia ekanamičnaj situacyi ŭ krainie — 66% prahnazujuć, što vyrastuć ceny, 63% — što na Biełaruś nakładuć bolš žorstkija sankcyi. 37% apytanych ličać, što kraina moža sutyknucca z deficytam praduktaŭ. Ale nie ŭsio biełarusy piesimisty — 15% vieryć, što ekanomika Biełarusi stabilizujeca, a 10% — što žyćcio prostaha čałavieka palepšycca.
U cełym 56% biełarusaŭ ličać, što nie zasłuhoŭvajuć takoha ž niehatyŭnaha staŭleńnia z boku zachodnich krain da siabie, jak hramadzianie Rasii. Tolki 15% zhodnyja, što zvyčajnyja biełarusy taksama vinavatyja ŭ tym, što z našaj terytoryi ździajśniajecca ahresija suprać Ukrainy. Tyja, chto nie padtrymlivaje dziejańni Rasii, čaściej ličać biełarusaŭ vinavatymi ŭ kanflikcie, u toj ža čas jany čaściej dumajuć, što nie zasłuhoŭvajuć takoha ž niehatyŭnaha staŭleńnia, jak hramadzianie RF.
Piataja častka hramadstva nie vyznačyłasia, što varta było b rabić Biełarusi paśla pačatku bajavych dziejańniaŭ pamiž Rasijaj i Ukrainaj. Biełarusy pa-raniejšamu nie žadajuć pramoha ŭdziełu ŭ vajnie ni na adnym z bakoŭ.
Respandenty nie dumajuć, što vajna pierakiniecca na terytoryju Biełarusi, i ŭpeŭnienyja, što naša armija nie budzie ŭdzielničać u kanflikcie. Adnak bolšaść aścierahajecca, što Rasija ŭciahnie ŭ vajnu Biełaruś.
Što kali vajna budzie ŭ našaj krainie? Bolšaść apytanych chutčej pakłapociacca pra abaronu ŭłasnych intaresaŭ — zakupiać lekaŭ i praduktaŭ, pačnuć aščadžać hrošy, padrychtujucca da pierajezdu. Mitynhi suprać vajny buduć hatovy naviedvać 15%. Tolki 9% hramadzian hatovyja ŭstupić u šerahi ŭzbrojenych sił, a 7% — padtrymlivać udzieł Biełarusi ŭ vajnie.
Mieniej za čverć hramadstva ličyć, što ŭ vypadku ŭdziełu biełaruskaj armii ŭ vajnie na baku Rasii našy vajskoŭcy prymali b aktyŭny ŭdzieł, 22% miarkuje, što biełaruskija sałdaty skłali b zbroju i admovilisia ad vykanańnia zahadaŭ, a 19% čakaje ad biełaruskaj armii ŭciokaŭ z pola boju.
Admova vykonvać zahady hramadstvam usprymajecca jak bolš prymalnaje dziejańnie, čym zdača ŭ pałon ukrainskim uzbrojenym siłam.
Sacyjołah Hienadź Koršunaŭ patłumačyŭ, čamu rasijanie tak padtrymlivajuć vajnu, a biełarusy — nie
U Rasii sprabujuć vyśvietlić, ci chočuć ruskija vajny. I vyhladaje, što chočuć
Ciapier čytajuć
Były ministr kultury Rusłan Čarniecki znajšoŭ sabie padpracoŭku6
Kamientary