Jak Biełaruś saŭdzielničaje ŭ napadzie na Ukrainu: pakazvajem na mapie
Rasija napała na Ukrainu ranicaj 24 lutaha. Biełaruskija ŭłady robiać vyhlad, što naša kraina nie maje nijakaha dačynieńni da ataki na susiedziaŭ. Ale ž pastajanna pastupajuć źviestki pra pieramiaščeńni rasijskaj vajskovaj techniki pa terytoryi Biełarusi, pra ŭvachod va Ukrainu rasijskich vajskoŭcaŭ praź biełaruskuju miažu, pra rasijskija tanki, BTR, «Urały», jakija ruchajucca pa biełarusich darohach u bok Ukrainy. «Naša Niva» sabrała ŭsie śviedčańni na adnoj mapie. Šmat rasijskaj techniki, jakaja ruchajecca ŭ bok ukrainskaj miažy pa biełaruskaj ziamli, paznačanaja łacinskimi litarami «V» i «O». Vajskovaja technika Rasii z takimi paznakami ŭdzielničaje ŭ napadzie na Ukrainu, viadzie bai na ŭkrainskaj terytoryi.
Za pieršyja dva dni vajny ŭ Biełarusi zaŭvažyli rasijskuju techniku, avijacyju i vajskoŭcaŭ u asnoŭnym na terytoryjach, nabližanych da miažy z Ukrainaj. Ale nie tolki.
My sabrali źviestki pra pieramiaščeńni rasijskich vojskaŭ pa terytoryi Biełarusi, jakija dastupnyja ŭ adkrytych krynicach. Brali tolki tyja fakty, jakija paćviardžajucca adnačasova niekalkimi fotami ci videa.
24 lutaha
Minsk: u stalicy zaŭvažyli kałonu rasijskich vajskovych «KamAZaŭ».
Homiel: ŭ horadzie zafiksavali kałonu rasijskaj vajskovaj techniki.
Brahin—Chojniki: prosta z aŭtadarohi ŭźlatali bajavyja viertaloty Mi-24. U toj ža dzień z rasijskich viertalotaŭ byŭ vysadžany desant u aeraporcie Hastomiel na poŭnač ad Kijeva.
Brahinski rajon: zaŭvažyli vajskovuju techniku z paznakaj «V», jana ruchałasia ŭ bok ukrainskaj Prypiaci.
Mazyr—Chojniki: pamiž haradami ruchałasia vajskovaja technika.
Chojniki: kala horada zaŭvažyli kałonu vajskovaj techniki ź litaraj «V».
Ašmiany: zaŭvažanaja vajskovaja technika, u tym liku zienitnyja rakietnyja kompleksy.
Punkt propuska Siańkoŭka—Viesiałoŭka: na terytoryju Ukrainy zajechała vajskovaja technika z paznakaj «O», heta trapiła na kamieru videanazirańnia.
Cierachoŭka, Dobrušski rajon: zaŭvažyli kałonu rasijskaj vajskovaj techniki. Nie mienš za 11 aŭtamabilaŭ «KamAZ», dva «Urała» i adzin bronieaŭtamabil «Tyhr».
Hvoźnica, Małarycki rajon, Bresckaja vobłaść: zaŭvažyli kałonu rasijskaj vajskovaj techniki.
Dubica, Brescki rajon: zaŭvažyli kałonu rasijskich vojskaŭ.
Pinsk: kala horada zaŭvažyli kałonu rasijskaj vajskovaj techniki (8 hruzavych aŭtamabilaŭ «KamAZ» i «Urał», 4 braniavanyja raźviedvalnyja mašyny).
Babrujsk: zaŭvažyli 6 rasijskich vajskovych bienzavozaŭ sa znakam «V».
Trasa R-37: zaŭvažyli kałonu rasijskaj vajskovaj techniki, jakaja ruchałasia ŭ bok Naroŭli.
Punkt propuska Alaksandraŭka-Vilča: praź jaho va Ukrainu zajšła rasijskaja vajskovaja technika, zajaviła Pamiežnaja słužba Ukrainy.
Zona adčužeńnia na terytoryi Biełaruskaha Paleskaha dziaržaŭnaha radyjacyjna-ekałahičnaha zapaviednika, zakinutaja vioska Daŭlady: źjaviŭsia pantonny most cieraz Prypiać, pa im rasijskija vojski zajšli z terytoryi Biełarusi na terytoryju Ukrainy.
Miaža Biełarusi i Ukrainy: mienavita z terytoryi Biełarusi rasijskija vojski ŭvajšli ŭ zonu ČAES.
Mazyr: u balnicu byli dastaŭlenyja paranienyja rasijskija sałdaty.
25 lutaha
Minsk: kala vajskovaha špitala zaŭvažany rasijski vajskovy «Urał» ź litaraj «V».
Homiel: i ŭ pieršy, i ŭ druhi dzień vajny ŭ balnicu byli dastaŭlenyja paranienyja rasijskija sałdaty.
Brest: u horadzie zaŭvažyli rasijskija vajskovyja hruzaviki, bronieaŭtamabil «Tyhr», a taksama bronieaŭtamabil Roshvardyi RF.
Barysaŭ: kala horada zaŭvažyli kałonu rasijskaj vajskovaj techniki.
Minsk-Mahiloŭ, trasa M-5: zaŭvažyli hruzaviki z paznakaj «V».
Babrujsk: na aeradromie kala horada 24 i 25 lutaha pryziamlalisia šmatlikija samaloty vajenna-transpartnaj avijacyi Rasii.
Baranavičy: zaŭvažanyja try palivazapraŭščyki, paznačanyja litaraj «V».
Marjina Horka: na trasie M-5 zaŭvažyli vajskovuju techniku z paznakaj «V».
Hrodna: zaŭvažanyja BTR i tanki.
Brest: biełaruskaja čyhunka pieravozić rasijskuju braniatechniku.
Brest-Makrany: pamiž nasielenymi punktami ruchałasia vajskovaja technika z paznakaj «V».
Minskaja vobłaść: Hienštab ZSU paviedamiŭ, što kiravańnie i pasadka rasijskaj avijacyi ažyćciaŭlajecca samalotami A-50 z terytoryi Minskaj vobłaści.
Smalavičy: zaŭvažyli kałonu rasijskich vajskovych hruzavikoŭ.
Homiel: Hienštab ZSU paviedamiŭ, što na biełaruskim aeradromie Homiel ździejśnili pasadku rasijskija Ił-76 z desantnikami na borcie.
Homiel: u horadzie zaŭvažyli braniatechniku z paznakaj «V».
Homiel-Mazyr: pamiž haradami ruchałasia kałona rasijskaj braniatechniki, paznačanaj litaraj «V».
Rečyca: u bok Kalinkavičaŭ ruchałasia rasijskaja braniatechnika.
Małaryta—Kobryn: pamiž haradami ruchałasia kałona rasijskaj braniatechniki, paznačanaj litaraj «V».
Baranavičy: na aeradromie zaŭvažanyja samalot dalokaha radyjołakacyjnaha vyjaŭleńnia i kiravańnia i pavietrany kamandny punkt VKS RF.
Novaja Hrebla, Brahinski rajon: zaŭvažany vajskovy łahier.
Krynicy infarmacyi: Pamiežny kamitet Ukrainy, telehram-kanał «Biełaruski hajun», karespandent BuzzFeed News Krystafier Miler, Anton Hieraščanka, daradca ministra ŭnutranych spraŭ Ukrainy, fota, zroblenyja čytačami roznych biełaruskich sajtaŭ i telehram-kanałaŭ, karystalnikami sacsietak.
Kamientary