Як Беларусь саўдзельнічае ў нападзе на Украіну: паказваем на мапе
Расія напала на Украіну раніцай 24 лютага. Беларускія ўлады робяць выгляд, што наша краіна не мае ніякага дачыненні да атакі на суседзяў. Але ж пастаянна паступаюць звесткі пра перамяшчэнні расійскай вайсковай тэхнікі па тэрыторыі Беларусі, пра ўваход ва Украіну расійскіх вайскоўцаў праз беларускую мяжу, пра расійскія танкі, БТР, «Уралы», якія рухаюцца па беларусіх дарогах у бок Украіны. «Наша Ніва» сабрала ўсе сведчанні на адной мапе. Шмат расійскай тэхнікі, якая рухаецца ў бок украінскай мяжы па беларускай зямлі, пазначаная лацінскімі літарамі «V» і «O». Вайсковая тэхніка Расіі з такімі пазнакамі ўдзельнічае ў нападзе на Украіну, вядзе баі на ўкраінскай тэрыторыі.
За першыя два дні вайны ў Беларусі заўважылі расійскую тэхніку, авіяцыю і вайскоўцаў у асноўным на тэрыторыях, набліжаных да мяжы з Украінай. Але не толькі.
Мы сабралі звесткі пра перамяшчэнні расійскіх войскаў па тэрыторыі Беларусі, якія даступныя ў адкрытых крыніцах. Бралі толькі тыя факты, якія пацвярджаюцца адначасова некалькімі фотамі ці відэа.
24 лютага
Мінск: у сталіцы заўважылі калону расійскіх вайсковых «КамАЗаў».
Гомель: ў горадзе зафіксавалі калону расійскай вайсковай тэхнікі.
Брагін—Хойнікі: проста з аўтадарогі ўзляталі баявыя верталёты Мі-24. У той жа дзень з расійскіх верталётаў быў высаджаны дэсант у аэрапорце Гастомель на поўнач ад Кіева.
Брагінскі раён: заўважылі вайсковую тэхніку з пазнакай «V», яна рухалася ў бок украінскай Прыпяці.
Мазыр—Хойнікі: паміж гарадамі рухалася вайсковая тэхніка.
Хойнікі: каля горада заўважылі калону вайсковай тэхнікі з літарай «V».
Ашмяны: заўважаная вайсковая тэхніка, у тым ліку зенітныя ракетныя комплексы.
Пункт пропуска Сянькоўка—Весялоўка: на тэрыторыю Украіны заехала вайсковая тэхніка з пазнакай «О», гэта трапіла на камеру відэаназірання.
Церахоўка, Добрушскі раён: заўважылі калону расійскай вайсковай тэхнікі. Не менш за 11 аўтамабіляў «КамАЗ», два «Урала» і адзін бронеаўтамабіль «Тыгр».
Гвозніца, Маларыцкі раён, Брэсцкая вобласць: заўважылі калону расійскай вайсковай тэхнікі.
Дубіца, Брэсцкі раён: заўважылі калону расійскіх войскаў.
Пінск: каля горада заўважылі калону расійскай вайсковай тэхнікі (8 грузавых аўтамабіляў «КамАЗ» і «Урал», 4 браняваныя разведвальныя машыны).
Бабруйск: заўважылі 6 расійскіх вайсковых бензавозаў са знакам «V».
Траса Р-37: заўважылі калону расійскай вайсковай тэхнікі, якая рухалася ў бок Нароўлі.
Пункт пропуска Аляксандраўка-Вільча: праз яго ва Украіну зайшла расійская вайсковая тэхніка, заявіла Памежная служба Украіны.
Зона адчужэння на тэрыторыі Беларускага Палескага дзяржаўнага радыяцыйна-экалагічнага запаведніка, закінутая вёска Даўляды: з’явіўся пантонны мост цераз Прыпяць, па ім расійскія войскі зайшлі з тэрыторыі Беларусі на тэрыторыю Украіны.
Мяжа Беларусі і Украіны: менавіта з тэрыторыі Беларусі расійскія войскі ўвайшлі ў зону ЧАЭС.
Мазыр: у бальніцу былі дастаўленыя параненыя расійскія салдаты.
25 лютага
Мінск: каля вайсковага шпіталя заўважаны расійскі вайсковы «Урал» з літарай «V».
Гомель: і ў першы, і ў другі дзень вайны ў бальніцу былі дастаўленыя параненыя расійскія салдаты.
Брэст: у горадзе заўважылі расійскія вайсковыя грузавікі, бронеаўтамабіль «Тыгр», а таксама бронеаўтамабіль Росгвардыі РФ.
Барысаў: каля горада заўважылі калону расійскай вайсковай тэхнікі.
Мінск-Магілёў, траса М-5: заўважылі грузавікі з пазнакай «V».
Бабруйск: на аэрадроме каля горада 24 і 25 лютага прызямляліся шматлікія самалёты ваенна-транспартнай авіяцыі Расіі.
Баранавічы: заўважаныя тры палівазапраўшчыкі, пазначаныя літарай «V».
Мар’іна Горка: на трасе М-5 заўважылі вайсковую тэхніку з пазнакай «V».
Гродна: заўважаныя БТР і танкі.
Брэст: беларуская чыгунка перавозіць расійскую бранятэхніку.
Брэст-Макраны: паміж населенымі пунктамі рухалася вайсковая тэхніка з пазнакай «V».
Мінская вобласць: Генштаб ЗСУ паведаміў, што кіраванне і пасадка расійскай авіяцыі ажыццяўляецца самалётамі А-50 з тэрыторыі Мінскай вобласці.
Смалявічы: заўважылі калону расійскіх вайсковых грузавікоў.
Гомель: Генштаб ЗСУ паведаміў, што на беларускім аэрадроме Гомель здзейснілі пасадку расійскія Іл-76 з дэсантнікамі на борце.
Гомель: у горадзе заўважылі бранятэхніку з пазнакай «V».
Гомель-Мазыр: паміж гарадамі рухалася калона расійскай бранятэхнікі, пазначанай літарай «V».
Рэчыца: у бок Калінкавічаў рухалася расійская бранятэхніка.
Маларыта—Кобрын: паміж гарадамі рухалася калона расійскай бранятэхнікі, пазначанай літарай «V».
Баранавічы: на аэрадроме заўважаныя самалёт далёкага радыёлакацыйнага выяўлення і кіравання і паветраны камандны пункт ВКС РФ.
Новая Грэбля, Брагінскі раён: заўважаны вайсковы лагер.
Крыніцы інфармацыі: Памежны камітэт Украіны, тэлеграм-канал «Беларускі гаюн», карэспандэнт BuzzFeed News Крыстафер Мілер, Антон Герашчанка, дарадца міністра ўнутраных спраў Украіны, фота, зробленыя чытачамі розных беларускіх сайтаў і тэлеграм-каналаў, карыстальнікамі сацсетак.
Цяпер чытаюць
Азаронак напісаў пра палітэмігранта — пасля гэтага брата і бацьку таго кінулі за краты2
Каментары