Novym prezidentam Turkmienistana, chutčej za ŭsio, stanie syn ciapierašniaha kiraŭnika Hurbanhuły Bierdymuchamiedava Sierdar. Daterminovyja vybary ŭ samaj zakrytaj krainie byłoha SSSR projduć 12 sakavika.
Što viadoma pra Sierdara Bierdymuchamiedava i čamu «zastupnik turkmien» Hurbanhuły Bierdymuchamiedaŭ vyrašyŭsia na taki krok ciapier, piša russkaja słužba VVS.
Darohu ‒ maładym
Bierdymuchamiedaŭ-starejšy ŭ piatnicu, 11 lutaha, zajaviŭ, što źbirajecca ŭ chutkim časie adyści ad spraŭ. 64-hadovy prezident skazaŭ, što dasiahnuŭ «uzrostu praroka», i čas dać darohu maładym. Pry hetym imia svajho syna jon adkryta nie nazvaŭ. Dakładna nie skazaŭ i čym sam źbirajecca zajmacca, ale namiaknuŭ, što praciahnie być staršynioj vierchniaj pałaty parłamienta.
«Ja padtrymlivaju dumku, što darohu da dziaržaŭnaha kiravańnia na novym etapie raźvićcia našaj krainy treba dać maładym kiraŭnikam. Svoj vializny žyćciovy i palityčny vopyt ja jak staršynia Chałk masłachaty (vierchniaja pałata parłamienta Turkmienistana, - Red.) maju namier dalej nakiroŭvać u hetuju vobłaść», ‒ skazaŭ Bierdymuchamiedaŭ, jaki zaniaŭ pasadu prezidenta 15 hadoŭ tamu.
64-hadovy Hurbanhuły Bierdymuchamiedaŭ byŭ abrany prezidentam u treci raz u 2017 hodzie i pavinien byŭ skončyć hety termin u 2024 hodzie.
Ale płany źmianilisia. Mahčyma, dla hetaha i nie adna pryčyna.
Jašče ŭ 2019 hodzie pajšli čutki ab prahresujučaj chvarobie prezidenta ‒ cukrovym dyjabiecie.
A tut jašče niaŭdały dośvied azijackich despatyj pa pieradačy ŭłady ‒ sproba tranzitu ŭłady ŭ siamji pieršaha prezidenta Uźbiekistana Isłama Karymava i adchileńnie ad ułady eks-prezidenta Kazachstana Nursułtana Nazarbajeva.
Nu i syn jakraz dasiahnuŭ 40 hadoŭ, uzrostu ź jakoha hramadzianie mohuć vyłučacca ŭ prezidenty.
Syn-pierajemnik
Bierdymuchamiedaŭ rychtavaŭ syna ŭ pierajemniki na praciahu apošnich piaci hadoŭ, pryznačajučy na roznyja pazicyi va ŭradzie. Sierdar Bierdymuchamiedaŭ apošnim časam źjaŭlaŭsia ŭ hramadskaj prastory i ŚMI navat čaściej za baćku. Niadaŭna jon prajechaŭsia pa rehijonach respubliki, vystupaje z pramovami na hałoŭnym telebačańni i ździajśniaje mižnarodnyja vizity.
Palityčnaja karjera Sierdara Bierdymuchamiedava (čyjo imia z turkmienskaha pierakładajecca jak «pravadyr») raźvivałasia imkliva.
Pa adukacyi Sierdar Bierdymuchamiedaŭ inžynier-technołah. Jon vypusknik Turkmienskaha sielhasuniviersiteta i doktar techničnych navuk. Adziny syn Hurbanhuły Bierdymuchamiedava i samy publičny ź jaho dziaciej. Pra siaścior Sierdara viadoma tolki, što jany zamužam i pražyvajuć za miažoj (mierkavana ŭ Vialikabrytanii i Francyi).
Sierdar pačaŭ karjeru z dypłamatyčnych pazicyj u pasolstvie Turkmienistana ŭ Rasii ŭ 2008-2011 hadach, zatym u pastajannym pradstaŭnictvie Turkmienistana ŭ AAN u 2011-2013 hadach. Paralelna skončyŭ Dypłamatyčnuju Akademiju MZS Rasijskaj Fiederacyi.
Viarnuŭšysia na radzimu ŭ 2014 hodzie, pačaŭ kuryravać źniešniuju palityku Turkmienistana.
Apošnija čatyry hady Sierdar chutka mianiaŭ pasady va ŭradzie, byŭ namieśnikam ministra zamiežnych spraŭ, namieśnikam hubiernatara, a zatym i hubiernataram, ministram pramysłovaści i budaŭnictva.
Ciapier zajmaje pasadu vice-premjera pa pytańniach finansaŭ i ekanomiki, źjaŭlajecca členam Dziaržaŭnaha savieta biaśpieki i kiraŭnikom Vyšejšaj kantrolnaj pałaty adnačasova.
Prapanova vyłučyć kandydaturu Sierdara Bierdymuchamiedava ŭ partyi była pryniataja adnahałosna.
Realnych kankurentaŭ u Sierdara na vybarach niama, jak niama i realnaha palityčnaha žyćcia ŭ Turkmienistanie.
Intryha zaklučajecca tolki ŭ tym, nakolki Sierdar budzie niezaležny i aŭtanomny ad baćki.
Ekśpierty zhadžajucca ŭ tym, što čakać libieralizacyi ŭłady ad Sierdara nie treba.
«Ale nakolki Sierdar ŭśviedamlaje ŭsiu surjoznaść prablem i pahroz, nakolki jon budzie zaležać ad mierkavańnia i cisku baćki i roznych elitnych hrup ‒ dumaju, hetaha pakul nie viedaje jon sam. Jon prychodzić da ŭłady ŭ momant, kali ŭvieś resurs «zakručvańnia hajek» u krainie praktyčna vyčarpany, dalej tolki masavyja represii», — havoryć palitołah z Turkmienistana, jaki publična kamientuje padziei ŭ krainie pad psieŭdanimam Ajtakoŭ.
Kamientary