«Pytańnie Kryma było kazyrnaj kartaj. Łukašenka vykłaŭ jaje, kab zapłacić Pucinu za važnuju pasłuhu». Palitołah pra schavanyja sensy hučnaj zajavy
U intervju Kisialovu Alaksandr Łukašenka pryznaŭ Krym rasijskim i raskazaŭ pra płany na vizit u Sievastopal. Što staić za hetaj palityčnaj zajavaj? Razvažaje palitołah Valer Karbalevič.
«Kali raniej, prynamsi da prezidenckich vybaraŭ, Biełaruś imknułasia zachoŭvać pazicyju niejtralitetu, Łukašenka prapanoŭvaŭ siabie na rolu miratvorca, miedyjatara i abiacaŭ Ukrainie, što z našaj terytoryi nijakich pahrozaŭ vajennych joj nie budzie, to ciapier situacyja rezka pamianiałasia, — kaža Valer Karbalevič. — Najpierš tamu, što Łukašenka ŭpisaŭsia ŭ ahulny kanflikt Rasii z Zachadam. Pa ŭnutrypalityčnych pryčynach — pakolki Zachad jaho nie pryznaŭ, padtrymaŭ apanientaŭ.
Važniejšym elemientam hetaha supraćstajańnia jość kanflikt Rasii z Ukrainaj. Tamu łohika palityčnaha pracesu niaŭchilna šturchała Łukašenku na toje, kab u hetym kanflikcie pierastać być niejtralnym. Što jon pastupova i rabiŭ.
U hetym sensie vielmi važnaja zajava była ŭčora na naradzie ź Ministerstvam abarony, dzie jon skazaŭ, što ŭ vypadku vajny Rasii z Ukrainaj Biełaruś nie zastaniecca ŭ baku i budzie na pazicyjach Rasii. I siońnia bačym praciah hetaj linii.
Ja dumaju, što pytańnie Kryma było kazyrnaj kartaj Łukašenki, jakuju jon vykłaŭ na stoł u krytyčny momant, kab zapłacić Pucinu za niejkuju vielmi važnuju pasłuhu. Jakuju — možna tolki zdahadvacca. Vykažu hipotezu, što heta płata za padtrymku Pucinym taho varyjanta tranzitu ŭłady abo refierendumu, jaki Łukašenka choča pravieści.
Ciapier hałoŭnaje dla Łukašenki nie kredyty, a toje, jak utrymacca va ŭładzie i ažyćciavić svoj varyjant tranzitu, adnosna jakoha ŭ Pucina jość niejkija piarečańni».
Jak na takija zajavy adreahuje Zialenski i ci akažucca pad pahrozaj ekanamičnyja kantrakty?
«Na ŭzroŭni rytoryki Ukraina budzie žorstka pratestavać. Ale ja dumaju, što bolš mocnaja reakcyja budzie nie na słovy, a na mierkavany vizit u Sievastopal, pra jaki kazaŭ Łukašenka. Heta ŭžo budzie kankretny palityčny chod, i Ukraina budzie reahavać bolš rašuča.
Pytańnie ŭ tym, ci budzie heta reakcyja tolki na słovach albo ŭ dziejańniach. Dla Ukrainy ekanamičnyja adnosiny z nami vielmi važnyja. Bo Biełaruś dla ich — heta krynica i bienzinu, i bitumu. I čym moža Ukraina zamianić heta, ja ź ciažkaściu ŭjaŭlaju.
Tamu dumaju, što pamiž rytorykaj i realnymi dziejańniami budzie davoli vialikaja dystancyja», — miarkuje palitołah.
Čytajcie taksama:
Łukašenka ŭ intervju prapahandystu Kisialovu pryznaŭ Krym rasijskim. Što jon raniej kazaŭ pra paŭvostraŭ?
-
Statkievič zmadelavaŭ padziei, što mohuć razharnucca ŭ Biełarusi ŭvosień
-
Litoŭski błohier paskardziŭsia, što «Naša Niva» niapravilna pierakazała jaho dyjałoh sa Sparyšam. Kamisija pa etycy stała na bok «NN»
-
Statkievič: U 1917 hodzie pryncyp «Vojna do pobiednoho kanca» ŭžo pryvioŭ Rasiju da nacyjanalnaj katastrofy
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy
Kamientary