Amierykanskija vajskoŭcy paśla niekalkich dzion zacišša abviaścili pra novuju sieryju ŭdaraŭ pa Iranie, nazvaŭšy ich adkazam na raniejšuju sprobu Tehierana atakavać vojski ZŠA ŭ rehijonie.
Napiaredadni prezident Donald Tramp anansavaŭ «vielmi mocny» ŭdar paśla ataki Irana na amierykanskuju vajskovuju bazu ŭ Iardanii, piša Bi-bi-si.
«Siońnia a 20:00 pa ŭschodnim (amierykanskim) časie ŭzbrojenyja siły ZŠA pačali nanosić udary pa Iranie. Hetyja ŭdary źjaŭlajucca mahutnym adkazam na sprobu iranskaha napadu na amierykanskija vojski, dysłakavanyja na Blizkim Uschodzie», — zajaviła Centralnaje kamandavańnie ZŠA (CENTCOM) u sacyjalnaj sietcy X.
A 22:00 pa ŭschodnieamierykanskim časie (piataja ranicy pa Minsku) «sieryja mahutnych udaraŭ» była zavieršana. Pavodle paviedamleńnia CENTCOM, udary byli naniesieny pa dziasiatkach abjektaŭ Korpusa vartavych isłamskaj revalucyi (KVIR): kamandnych centrach, abjektach zapusku rakiet i bieśpiłotnikaŭ, a taksama abjektach bierahavoj achovy.
U niekalkich rajonach na poŭdni Irana byli čutnyja vybuchi, paviedamlaje Reuters sa spasyłkaj na iranskija ŚMI. Dziaržaŭnaje telebačańnie paviedamiła pra vybuchi ŭ horadzie Achvaz. Ahienctva Tasnim pieradaje, što rakietny ŭdar zakranuŭ žyły kvartał na vostravie Kiešm. Taksama paviedamlajecca pra vybuch u Bušery, dzie znachodzicca atamnaja elektrastancyja, u budaŭnictvie jakoj udzielničaje Rasija.
Heta pieršyja ŭdary ZŠA pa Iranie paśla taho, jak u piatnicu Donald Tramp prypyniŭ bambardziroŭki paśla ŭzajemnych atak, jakija praciahvalisia 13 načej zapar, kab dać mahčymaść adnavić pieramovy. Novyja ŭdary stali adkazam na ataku Irana na amierykanskuju vajskovuju bazu ŭ Iardanii, ździejśnienuju ŭ aŭtorak. Pavodle amierykanskich vajskoŭcaŭ, tady ŭsie iranskija rakiety byli pierachopleny.
U sieradu Tramp zajaviŭ žurnalistam u Biełym domie: «My źbirajemsia vielmi mocna ŭdaryć pa ich, tamu što ciapier naša čarha nanosić udar. Jany viedajuć, što heta adbudziecca. Jany prasili nas hetaha nie rabić».
«Pahladzim, ci ŭdasca nam u niejki momant dasiahnuć pahadnieńnia. Ale my źbirajemsia nanieści im vielmi mocny ŭdar», — dadaŭ amierykanski prezident.
Jašče raniej u efiry Fox News jon vykazaŭsia bolš hruba: «My źbirajemsia nadrać im zadnicu».
Paźniej Tramp vykazaŭ zdahadku, što napad byŭ ździejśnieny pa inicyjatyvie nie toj častki iranskaha kiraŭnictva, ź jakoj ZŠA sprabujuć vieści pieramovy: «Heta była inšaja hrupa, nie taja, ź jakoj my majem spravu. Jany ŭžo paprasili prabačeńnia, ale, viedajecie, nam treba budzie krychu ich adšlopać».
Ciapier čytajuć
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca15
Kamientary