«Mianie zabrali z pracy». Za kamientary pra mihrantaŭ zatrymlivajuć biełarusaŭ i prymušajuć vybačacca na videa
Na dziaržaŭnym kanale «Biełaruś 4 Homiel» vyjšaŭ siužet, pryśviečany miascovym žycharam, jakija pakidali «niapravilnyja» kamientary na adras mihrantaŭ. Pakazali i videa z vybačeńniami kamientataraŭ. Miarkujučy pa skrynach, jakija demanstrujucca ŭ siužecie, vynikaje, što siłaviki zacikavilisia padpisčykami rehijanalnaha pablika «UKantakcie» pad nazvaj «Homiel Siejčas». Niekatorych kamientataraŭ vyklikali ŭ milicyju ci zatrymlivali. Taksama zapisali ŭžo tradycyjnyja videa, na jakich ludzi vybačajucca za kamientary. Pry hetym niezrazumieła, što za kramoła była ŭ tych kamientarach. Naprykład, adzin z mužčyn, jakija vybačajucca, napisaŭ: «Vuń dźviery, vuń Irak». «Naša Niva» vyśvietliła, što jak minimum dvoje hierojaŭ siužeta ciapier na voli.
«Ja nie pisaŭ ničoha rezkaha. Sens majho kamientara byŭ taki: łamać i łamicca nie vielmi dobra, tak nichto nie prosicca da susiedziaŭ, — raskazvaje «Našaj Nivie» adzin z kamientataraŭ. — Prajšło mienš za sutki, na nastupny dzień mianie zabrali z pracy. Mianie vyklikali, ja dumaŭ, u adździeł kadraŭ. A tut: «Vitajem, prajedziemsia!» Advieźli ŭ adździaleńnie milicyi.
Spačatku kazali, što nibyta niejkija prablemy na majoj minułaj pracy. Ale ŭ adździaleńni pakazali razdrukoŭku, jany viedali moj akaŭnt «UKantakcie».
Kažuć: «Vy ž razumiejecie, jak vašy słovy mohuć traktavacca ź jurydyčnaha punktu hledžańnia? My razumiejem, što vy mieli na ŭvazie, ale ź jurydyčnaha boku…» Karaciej, u takim duchu, što davajcie zapišam videa i zabudziemsia pra ŭsio heta.
A ŭ mianie na telefonie była paračka padpisak, skažam tak, na nie vielmi papularnyja ŭ ich resursy. Nu i ja zapisaŭ tyja vybačeńni.
Ale pry detalnym vyvučeńni majho telefona zaŭvažyli, što ja reposnuŭ u pryvatnaj razmovie paviedamleńnie miascovaha telehram-kanała, jaki ŭ śpisie ekstremisckich.
Nu i ŭsio. Tuju noč ja pravioŭ pad vartaj, na nastupny dzień byŭ sud. Mnie dali štraf u 10 bazavych vieličyń. Adnosna ciarpima, inšym dajuć i horš.
Vybačeńni na videa ja zapisać byŭ vymušany, bo majo mierkavańnie tam ni na što ŭžo nie ŭpłyvała. Kab bolš nie pakidali kamientary, hetaja ich mietodyka moža i padziejničaje, ale kab pierakanać kahości — nie viedaju.
Ci źmienicca majo mierkavańnie ciapier? Mahčyma, što vielmi źmienicca. Bo pracuju na dziaržaŭnym pradpryjemstvie, i kali sa mnoju nie praciahnuć kantrakt, to, kaniečnie, źmienicca. Było kiepskim — stanie jašče horšym».
Baćka inšaha kamientatara raspavioŭ «Našaj Nivie»:
«Kamientar byŭ cenzurny — jon prosta vykazaŭsia pra mihrantaŭ niedzie «UKantakcie». Adrazu pa jaho pryjšli.
Spačatku pryjšli da mianie, ale jon tut nie žyvie, tady pryjšli da jaho na pracu. I paśla vyklikali ŭ milicyju. Tam trymali 3,5 hadziny. Skazali: nie zapišaš, pasadzim na troje sutak. Kali zapišaš — adpuścim. Tak i adbyłosia, jon zapisaŭ i adpuścili. Suda nie było, kryminałki ci štrafaŭ nijakich taksama.
Čamu syn zapisaŭ toje videa z vybačeńniami? A čamu jamu siadzieć troje sutak? Za što — što praŭdu skazaŭ?»
Prykładna toje ž samaje adbyvałasia ŭ mai: paśla padzieńnia samalota ŭ Baranavičach, dzie zahinuli dva piłoty.
Tady za «nie tyja» kamientary zatrymali niekalki dziasiatkaŭ čałaviek, niekatoryja paśla raskazvali, što ich taksama prymušali vybačacca na kamieru, zatym adpuskali praz troje sutak.
Čytajcie taksama:
«Zachoŭvańnie z metaj raspaŭsiudžvańnia». Za padpisku na ekstremisckija kanały pačali sudzić?
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary