Chto atrymaje Nobieleŭskuju premiju pa litaratury? Prahnoz bukmiekieraŭ
Anivodnaha biełarusa niama ŭ śpisie patencyjnych kandydataŭ na litaraturnaha Nobiela za 2021 hod. Chto ŭvojdzie ŭ historyju jak čarhovy łaŭreat premii, stanie viadoma 7 kastryčnika.
Katory ŭžo hod bukmiekiery staviać na pładavitaha 72-hadovaha japonskaha ramanista Charuki Murakami, jaki piša masavuju litaraturu, i 83-hadovaha kienijskaha ramanista i dramaturha levych pohladaŭ Nhuhi va Tchionha (Ngugi Wa Thiongo). (Raniej ličanyja afrykanskija piśmieńniki atrymlivali Nobiela.)
Ale ŭporavień ź im iduć jašče piać aŭtaraŭ.
Heta taksama dźvie kanadki — 71-hadovaja En Karsan (Anne Carson) i 82-hadovaja Marharet Etvud (Margaret Atwood). Pieršaja — viadomaja elinistka, aŭtarka dysiertacyi pa tvorčaści Sapfo, litaraturaznaŭca i paetka. Druhaja — papularnaja paetka, prazaik, ekałahičnaja aktyvistka, łaŭreat dziasiatkaŭ roznych premij.
A jašče ŭ topie — 78-hadovaja rasijskaja ramanistka Ludmiła Ulickaja.
Jość u viersie śpisu i centralnajeŭrapiejski piśmieńnik — 67-hadovy vienhr Łasła Krasnahorkaj (László Krasznahorkai), jaki piša niaprostyja, postmadernisckija miełanchaličnyja ramany i pjesy.
Siarod favarytaŭ nazyvajuć taksama 84-hadovuju Maryzu Kande (Maryse Condé). Jana rodam z Hvadełupy — zamorskaha departamienta Francyi, piša pa-francuzsku pra minułaje tych afrykancaŭ, jakich zavozili na Karyby ŭ jakaści raboŭ. Kande ŭsio žyćcio aktyŭna padtrymlivała ruch za niezaležnaść Hvadełupy.
Nižej u śpisie — rumyn Mirča Kerteresku, kitajanka Džan Siue, francuz Mišel Uelbek, izrailcianin Amas Oz, ałbaniec Ismaił Kadare, čech Miłan Kundera i, viadoma ž, aŭtarka «Hary Potera» Džaan Roŭlinh.
Zrešty, bukmiekiery redka adhadvajuć imia nabielista. Tak, Murakami apynajecca ŭ viersie śpisu ŭžo ź dziasiatak hadoŭ, ale pakul premii nie zdabyŭ.
Tak, pazaletaś bukmiekiery čakali pieramohi En Karsan i Maryzy Kande, a premiju zdabyli Volha Takarčuk i Peter Handkie.
73-hadovaja Śviatłana Aleksijevič — adzinaja na siońnia Nobieleŭskvia łaŭreatka ź Biełarusi. Jana atrymała Nobieleŭskuju premiju ŭ 2015 hodzie.
U šort-listach pretendentaŭ na Nobieli ŭ śfierach ekanomiki, miedycyny, pryrodnych navuk biełarusaŭ pakul niama. Zatoje bukmiekiery ŭ śpis pretendentaŭ na Nobieleŭskuju premiju miru ŭklučajuć Śviatłanu Cichanoŭskuju. Žonka błohiera-palitviaźnia stała simvałam mirnaha ruchu biełarusaŭ za svabodnyja vybary, čałaviečuju hodnaść i adnaŭleńnie zakonnaści ŭ krainie.
Ciapier čytajuć
Salihorsk pračnuŭsia ŭ ružovym tumanie. Što heta było?1
Kamientary