Historyku z Połackaha ŭniviersiteta paśla 15 sutak aryštu dali jašče stolki ž. Abodva razy — pa 23.34

Paśla 15 sutak u CIP jaho znoŭ zatrymali, sudzili i pakarali takim ža terminam. Abodva razy — pa artykule 23.34 KaAP. Pra heta TUT.BY raspaviała žonka vykładčyka, Julija Jakubava.

Pavialičyć

Pieršy raz Viktara Jakubava zatrymali jašče 20 śniežnia — paśla dziciačaha śviata kala jołki ŭ Navapołacku. Vykładčyka abvinavačvali va ŭdziele ŭ łancuhu salidarnaści, jaki ŭ toj ža dzień adbyŭsia ŭ horadzie: u im stajaŭ bolš za dziesiatak haradžan z BČB-ściahami.

— Viktar nie byŭ ŭ tym łancuhu salidarnaści, jon navat nie viedaŭ pra hetu akcyju. My ź dziećmi — a ŭ nas ich dvoje, čatyroch i siami hadoŭ, — byli na śviacie kala jełki. Adtul Viktara i zabrali ŭ milicyju, — tłumačyć Julija Jakubava.

Troje sutak Jakubaŭ znachodziŭsia ŭ Centry izalacyi pravaparušalnikaŭ u miascovym HAUS. 23 śniežnia adbyŭsia sud, spravu adpravili ŭ milicyju na dapracoŭku. Paŭtorny razhlad prajšoŭ 5 studzienia.

Sudździa Zinaida Bałabołava dała vykładčyku 15 sutak administracyjnaha aryštu. Pakolki troje sutak jon užo pravioŭ u CIP, zastałosia 12.

Vykładčyk pavinien byŭ vyjści na svabodu 18 studzienia. Adnak hetaha nie adbyłosia.

— Viečieram 18 studzienia na muža skłali novy pratakoł i znoŭ zatrymali. Na hety raz jaho abvinavačvali ŭ šeści, jakoje adbyłosia ŭ Navapołacku taksama ŭ minułym hodzie — 5 śniežnia. Ja bačyła videa z hetaj akcyi. Na im — ćmianyja siłuety ludziej, i ŭdzieł u šeści možna prypisać kamu zaŭhodna. Sud adbyŭsia 20 studzienia, i taja ž sudździa Zinaida Bałabołava dała Viktaru znoŭ 15 sutak. Adzin ź milicyjantaŭ nibyta paznaŭ siarod udzielnikaŭ šeścia majho muža — pa pachodcy i akularach.

Juliju Jakubavu taksama 25 studzienia buduć sudzić pa abvinavačvańni va ŭdziele ŭ niesankcyjanavanym šeści ŭ Navapołacku 5 śniežnia.

— Milicyjanty pierakanany, što ja tam była. Na skrynšocie ź videa adzin čałaviečy cień abviedzieny kružočkam — i staić podpis «Jakubava».

Julija pieražyvaje za muža:

— Nieviadoma, kaho pakarali — Viktara ci mianie. Ciažka. Ale ja viedaju, što moj muž usio vytrymaje.

Viktar Jakubaŭ skončyŭ PDU pa śpiecyjalnaści «Historyja», navučaŭsia ŭ aśpirantury Instytuta historyi NAN Biełarusi. Z 2007 hoda pracuje ŭ rodnym univiersitecie. Prajšoŭ šerah navukovych stažyrovak va ŭniviersitetach u Polščy, Rasii, Vienhryi. Maje publikacyi, artykuły ŭ časopisach i navukovych zbornikach, encykłapiedyčnym zborniku, dakłady na mižnarodnych navukova-praktyčnych kanfierencyjach.

• 0
• 0
• 0
• 0
• 0
• 0
• 0
• 0