Siońnia Minski haradski sud znoŭ viarnuŭsia da kryminalnaj spravy vučonaha, akademika, łaŭreata Dziaržpremii, viadomaha doktara Alaksandra Bialeckaha. Jaho raniej pryznali vinavatym pa č. 3 art. 430 KK (Atrymańnie chabaru ŭ asabliva bujnym pamiery) i prysudzili da 7,5 hoda pazbaŭleńnia voli. Zaraz Alaksandr Valancinavič adbyvaje pakarańnie ŭ VK-3 (Vićba), piša Tut.by.
Na praces pa spravie Alaksandra Bialeckaha pryjšli tolki jaho rodnyja, asudžanaha ŭ Minsk nie dastaŭlali. Jak akazałasia, akademik źviarnuŭsia ŭ sud z zajavaj admianić kanfiskacyju. Na jahonuju majomaść byŭ nakładzieny aryšt, ale ŭ dachod dziaržavy jašče ničoha nie zabirałasia.
«U suviazi z ustupleńniem u siłu zakona RB ad 19 lipienia 2019 hoda prašu spynić vykanańnie prysudu ŭ častcy kanfiskacyi majomaści i vyzvalić mianie ad dadatkovaha pakarańnia», - začytała sudździa Valancina Ziańkievič zajavu Bialeckaha.
Hetym letam byli ŭniesieny źmieny ŭ Kryminalny kodeks: vyklučana dadatkovaje pakarańnie ŭ vyhladzie kanfiskacyi majomaści. Tamu prysud treba pryvieści ŭ adpaviednaść z novym zakonam. Zajavu Alaksandra Bialeckaha padtrymała jaho advakat Maryja Sieviaryn, prakuror Alaksandr Karol nie staŭ piarečyć suprać admieny kanfiskacyi majomaści. Sud pajšoŭ u daradčy pakoj, paśla abviaściŭ rašeńnie: vyzvalić asudžanaha Bialeckaha ad kanfiskacyi.
- U suviazi z vyklučeńniem art. 61 z KK asoby, asudžanyja da dadatkovaha pakarańnia ŭ vyhladzie kanfiskacyi majomaści, padlahajuć vyzvaleńniu ad hetaha vidu pakarańnia, kali jano nie vykanana. (…) Z ulikam ustanoŭlenych pa spravie akaličnaściaŭ Bialecki padlahaje vyzvaleńniu ad pryznačanaha dadatkovaha pakarańnia ŭ vyhladzie kanfiskacyi majomaści, - začytała rašeńnie sudździa Valancina Ziańkievič. - Varta admianić aryšt, nakładzieny na majomaść asudžanaha.
U rašeńni pieraličana ŭsio, što viernuć uraču: dźvie pamiatnyja maniety čempijanatu śvietu pa chakiei 2014 hoda; pamiatnuju manietu Śviaciciela Mikałaja Cudatvorca; draŭlanuju skrynku sa spodkam, padšklanki i łyžki; bolš za 125 tysiač dalaraŭ na rachunkach u bankach; aŭto BMW X3; haraž i kvateru ŭ Minsku; budynak u Ratamcy; parkovačnaje miesca; 65 tysiač jeŭra; 354 600 dalaraŭ; ablihacyi na 15 tysiač dalaraŭ; iPhone.
Nahadajem, u lutym 2019 hoda Minski haradski sud pryznaŭ navukoŭca, akademika, łaŭreata Dziaržpremii, viadomaha doktara Alaksandra Bialeckaha vinavatym u atrymańni chabaraŭ. Sam fihurant nia admaŭlaŭ: jon sapraŭdy atrymaŭ 4 tysiačy jeŭra i 3 tysiačy dalaraŭ, ale ŭsprymaŭ ich jak padarunak, a nie chabar. Častku hrošaj Bialecki patraciŭ na kanhres u Barsiełonie, dzie ŭ skład biełaruskaj delehacyi ŭvachodziła 12 čałaviek.
Kamientary