«Valli»
Padarunak ad studyi "Piksar".
Valli (WALL•E)
ZŠA, 2008, kalarovy, 103 chv.
Režyser: Endru Stentan
Žanr: Animacyjnaja fantastyčnaja kamedyja-meladrama
Adznaka: 8 (z 10)
Maleńki robat Valli spraŭna pracuje na Ziamli, jakuju ludzi pieraŭtvaryli ŭ ahramadnuju śmietnicu. Nieachajniki pakinuli planetu, jakuju ciapier ačyščajuć robaty. Kampaniju Valli składaje tolki visklivy prusak, ale hieroj nia vielmi sumuje. A kali na ziamlu spuścicca rabatesa Jeva, jakuju prysłali z sakretnym zadańniem, nahody dla sumu budzie jašče mieniej. Paračka robataŭ musić dastavić na karabiel zialonuju raślinu – dyj dapamahčy biestałkovym ludziam viarnucca dadomu…
Čarhovaja karcina studyi “Piksar” – heta śviata animacyi. Hieroi nia prosta vyhladajuć, jak žyvyja – heta paciešnyja istoty z svaim charaktaram, zvyčkami i niahodami, z svajoj dušoj. Kamputarnaja karcinka pazbaŭlenaja ŭsialakaj mašynnaj štučnaści, a śmiaciar Valli z ahientkaju Jevaj vyhladajuć ramantyčnaju paračkaj, jakaja lubić mjuzykły, tańčyć i ździajśniaje paciešna-hierojskija ŭčynki.
Valli ź vializnymi vačyma – heta šalny robat z “Karotkaha zamykańnia” i Vudzi Ałen u adnym fłakonie, paluboŭnik-niedareka z vohnietušycielem; daścipny mužčyna rabatesinaj mary, zdolny dziela kachanaj na ŭsio. Jeva – žančyna-vamp, ahientka i Lilijan Hiš ź fijaletavym pozirkam.
Kampanija hrateskna-prydurkavatych mašynak adcianiaje zornuju paru, jak maha efektniej.
Endru Stentan – aŭtar “Historyi cacak” i “U pošukach Nema” – jak zaŭždy raskvieciŭ hetuju vybitnuju stužku dla ŭsioj siamji zabaŭnymi spasyłkami j surjoznymi namiokami.
Atłuściełyja ludzi na kaśmičnym karabli, jakich kormiać mašyny (“Novyja časy” dyj antyŭtopii Hakśli). Šalny dvuboj kamandzira j šturvała (pryvitańnie “Kaśmičnaj Adysiei”). Karcinki pad Van Hoha, Sera i Renuara na finalnych nadpisach. I čaplinaŭski dotyk naprykancy stužki.
U karcinie amal niama dyjalohaŭ. Heta mjuzykał – i heta niamoje kino. Heta plastyka žestaŭ i masak. Heta cud adušaŭleńnia – i spraŭnaja navuka dla ludziej, jakija zhubili serca.
Ciapier čytajuć
Anton čatyry hady chavaŭsia ad łukašystaŭ u rodnych Baranavičach — zatrymali, kali vyrašyŭ zdać na pravy3
Kamientary