Ukrainskaja praŭda: Parašenka zasnavaŭ try afšory zamiest pieradačy Roshen ŭ «ślapy» trast

Piatro Parašenka, nasupierak zajavam, da hetaha času nie pieradaŭ svaje aktyvy ŭ trast, adnak pačaŭ restrukturyzacyju svaich aktyvaŭ Roshen, stvaryŭšy dla hetaha try afšornyja kampanii.

Pra heta havorycca ŭ rasśledavańni Hanny Babiniec «Dvajnoje žyćcio Prezidenta» dla prahramy «Ślidstvo.Info» na Hromadske TB.

«Faktyčnaja pieradača aktyvaŭ u trast patrabuje vykanańnia vialikaj kolkaści jurydyčnych farmalnaściaŭ. Na dadzieny momant jurydyčny daradca zabiaśpiečvaje zachavańnie takich farmalnaściaŭ», — havorycca ŭ adkazie kiraŭnika dyrektara ICU Makara Pasieniuka, upaŭnavažanaha pres-słužbaj Administracyi prezidenta adkazvać na pytańni žurnalistaŭ pra biźnies-spravy Parašenki.

Pra trast ŭ liście paviedamlajecca vyklučna ŭ budučym časie.

U adkazie na pytańnie pra firmu Prime Asset Partners Limited (BVI), jakuju Parašenka zasnavaŭ u žniŭni 2014 hoda, vyśvietliłasia, što afšornaja firma była nie adna.

«Prime Asset Partners Limited była zasnavana letam 2014 hoda ŭ chodzie praviadzieńnia karparatyŭnaj restrukturyzacyi, jakaja była padrychtoŭčaj stadyjaj dla dalejšaha prodažu hrupy Roshen. Paśla jaje zasnavańnia kampanija nie ažyćciaŭlała nijakaj dziejnaści, akramia toj, što pakazanaja nižej. Uvosień 2014 hoda Prime Asset Partners Limited zasnavała na Kipry kampaniju CEE Confectionery Investments Limited, jakaja ŭ svaju čarhu zasnavała ŭ Niderłandach kampaniju Roshen Europe BV», — havorycca ŭ paviedamleńni.

Jurydyčnyja daradcy Parašenki apraŭdvajuć stvareńnie afšornaj piramidy tym, što heta «adpaviadaje rynkavaj praktycy va Ukrainie dla kampanij, jakija padlahajuć prodažu stratehičnym inviestaram».

Jak viadoma, u studzieni 2016 h. Piatro Parašenka zajaviŭ, što pieradaŭ svaju dolu «Rašen» u niezaležny «ślapy» trast pad kiravańniem zamiežnaha banka.

«Ja ŭ hetym hodzie padpisaŭ damovu ab pieradačy majoj doli ŭ «Rašen» u niezaležny trast, jaki zasnavany na madeli «blind trust». Zhodna ź viadučymi mižnarodnymi standartami i ŭ poŭnaj adpaviednaści z zakanadaŭstvam Ukrainy», — zajaviŭ Parašenka.

«Pavodle hetaj damovy, ni adno majo ŭkazańnie nie maje jurydyčnaj siły. U jakaści ŭpraviciela Trast pryznačany reśpiektabielny zamiežny bank pieršaj katehoryi, jaki budzie vałodać, kantralavać i kiravać aktyvami», — dadaŭ jon.

U Administracyi prezidenta nie zmahli nazvać «Ukrainskaj praŭdzie» bank, jaki budzie kiravać «ślapym trastam».

Ślapy trast — heta sistema adnosin, u jakoj daviernym ułaśnikam zabaroniena davać bienieficyjaram usialakuju infarmacyju pra kiravańnie kapitałami trastu.

• 0
• 0
• 0
• 0
• 0
• 0
• 0
• 0