Budaŭnictva šmatfunkcyjanalnaha centra «Minsk-Mir» pavinna stać «uzoram supracoŭnictva ŭsiaho našaha słavianskaha śvietu». Pra heta zajaviŭ Alaksandr Łukašenka 22 červienia ŭ Minsku na sustrečy z saŭładalnikam sierbskaj kampanii «Braty Karyč» Bahalubam Karyčam i deputatam Narodnaj Skupščyny (parłamienta) Sierbii, hanarovym konsułam Biełarusi ŭ Białhradzie Drahamiram Karyčam.
Łukašenka ŭdakładniŭ, što, pavodle infarmacyi, jakuju jon maje, kampanija «Braty Karyč» paśpiachova viadzie svoj biźnies u Biełarusi. «Nie toje, što vialikich, naohuł prablem u vas tam niama. U vas prajekty iduć. Usio abiacanaje vy vykonvajecie», — zajaviŭ jon.
U toj ža čas, adznačyŭ kiraŭnik dziaržavy, prajektu pa budaŭnictvie centra «Minsk-Mir» nadajecca asablivaje značeńnie. «My pravalić jaho ŭžo nie majem nijakaha prava i pieradusim vy. Ja vielmi spadziajusia, što heta budzie sur`iozny prajekt, — skazaŭ Łukašenka. — Budzie vydatna, kali da hetaha prajekta dałučacca ŭsie respubliki, jakija niekali ŭvachodzili ŭ Juhasłaviju. Ja heta tolki vitać budu».
Prajekt «Minsk-Mir», pavodle mierkavańnia Łukašenki, abiacaje stać histaryčnym, tamu ni ŭ jakim razie nielha zastoparyć jaho realizacyju. Biełaruski bok, dadaŭ jon, prykładzie maksimum namahańniaŭ «u vypadku ŭźniknieńnia nieabchodnaści ŭstaranić niezrazumiełyja tarmažeńni».
Nahadajem, prajekt «Minsk-Mir» realizujecca na terytoryi aeraporta «Minsk-1». Paśla niekalkich niaŭdałych sprob pryciahnieńnia zamiežnych inviestycyj u prajekt «Minsk-Sici» (inviestdahavor z rasijskaj kampanijaj «Itera» byŭ skasavany ŭ 2012 hodzie) da zabudovy terytoryi aeraporta było vyrašana pryciahnuć sierbski chołdynh «Dana Astra», asnoŭnym uładalnikam jakoha ź`iaŭlajecca Drahamir Karyč. Adpaviedny ŭkaz Łukašenka padpisaŭ 22 vieraśnia 2014 hoda.
Kancepcyja kompleksu «Minsk-Mir» praduhledžvaje budaŭnictva mižnarodnaha finansavaha centra, budynka hramadska-dziełavoha pryznačeńnia, žyłoj zabudovy, a taksama inžyniernaj, transpartnaj i sacyjalnaj infrastruktury, u pryvatnaści škoły i dziciačaha sadka. Płanujecca taksama budaŭnictva handlovaha centra płoščaj 250 tys. kv. m. Ułady spadziajucca arhanizavać u kompleksie nie mienš jak 27 tys. novych pracoŭnych miescaŭ.
Mierkavany ab`iom inviestycyj u prajekt aceńvajecca ŭ 3,5 młrd. dołaraŭ. Pry hetym u raźvićcio transpartnaj i inžyniernaj infrastruktury nieabchodna ŭkłaści nie mienš jak 165 młn. dołaraŭ. Pavodle ŭkaza, aeraport «Minsk-1» pavinien budzie pastupova spynić svaju dziejnaść.
U lutym kiraŭnik Administracyi prezidenta Alaksandr Kosiniec na śpiecyjalnaj naradzie raskrytykavaŭ «nulavuju stupień» realizacyi prajekta «Minsk-Mir».
Akramia budaŭnictva kompleksu «Minsk-Mir», kampanija «Dana Astra» realizuje ŭ stalicy jašče niekalki prajektaŭ, u pryvatnaści budaŭnictva kompleksu «Majak Minska».
Kamientary