Rasija moža nakiravać miratvorcaŭ u Danieckuju vobłaść Ukrainy tolki z dazvołu Savieta biaśpieki AAN, zajaviŭ «Interfaksu» u paniadziełak 7 krasavika, kiraŭnik kamiteta Savieta Fiederacyi pa abaronie i biaśpiecy Viktar Azioraŭ.
Raniej u paniadziełak prarasijskija aktyvisty, jakija zachapili budynak Danieckaj abłasnoj administracyi, abviaścili ab stvareńni «Niezaležnaj Danieckaj respubliki». Rašeńnie było pryniata samaabvieščanym «narodnym savietam», stvoranym aktyvistami. Jon vystupiŭ za dałučeńnie «Niezaležnaj danieckaj respubliki» da Rasii, a taksama źviarnuŭsia da prezidenta RF Uładzimira Pucina z prośbaj ab uviadzieńni miratvorčaha kantynhientu.
Jak zajaviŭ Azioraŭ, «byli prykłady ŭviadzieńnia miratvorčaha kantynhientu na terytoryju Paŭdniovaj Asiecii i Abchazii, ale heta było ŭ ramkach SND, a prosta tak uziać i ŭvieści pa pryzyvie miascovych uładaŭ naš miratvorčy kantynhient u Danieck ci kudyści jašče — heta supiarečyć mižnarodnym pryncypam i normam».
Pry hetym jon padkreśliŭ, što «kali budzie pryniata rašeńnie Savieta biaśpieki AAN ab uvodzie miratvorcaŭ, tady Rasija jak pastajanny člen Savieta biaśpieki i ŭdzielnik Damovy pa supracoŭnictvie i biaśpiecy ŭ Jeŭropie moža ŭvajści ŭ skład miratvorčaha kantynhientu dla zabieśpiačeńnia biaśpieki ŭ tym ci inšym rehijonie».
Na dumku sienatara, «padšturchoŭvać situacyju (na ŭschodzie Ukrainy - DOŽDŽ) zvonku było b kontrpraduktyŭnym».
Napiaredadni ŭ troch haradach na ŭschodzie Ukrainy — Daniecku, Charkavie i Łuhansku — prajšli mitynhi prychilnikaŭ fiederalizacyi krainy pad rasiejski trykałor. Ich udzielniki patrabujuć pravieści refierendumy ab statusie rehijonaŭ. U Daniecku i Charkavie demanstranty ŭziali pad kantrol budynki abłasnych administracyj, u Łuhansku aktyvisty zachapili rehijanalnaje ŭpraŭleńnie Słužby biaśpieki Ukrainy (SBU).
Pa dadzienych MUS, budynak Charkaŭskaj abłasnoj administracyi vyzvalili ad zachopnikaŭ, adnak, jak pieradajuć miascovyja ŚMI, aktyvisty tam praciahvajuć znachodzicca.
Kamientary