Італьянская амбасада ў Мінску зладзіла адкрытую вечарыну ў Пасольскім дворыку. Беларусы сталі ў чэргі
Пасольства Італіі ў Беларусі паведаміла ў сваіх сацсетках, што 21 жніўня ў дворыку пасольства на вуліцы Ракаўскай, 16б адбудзецца адкрытае нефармальнае мерапрыемства «Летні вечар у Пасольскім дворыку». На імпрэзу запрашалі ўсіх ахвотных, і беларусы гэта ацанілі.
Арганізатары запрашалі ўсіх ахвотных правесці летні вечар у прыемнай атмасферы. Дрэскод быў Smart Casual, без гальштукаў, а гасцей чакалі вітальныя напоі, піца і марозіва.
Вечарына ладзілася не проста так, а з нагоды завяршэння трохгадовай місіі часовага паверанага ў справах Італіі ў Беларусі Тамаза П'етра Маркеджані.
Цяжка сказаць, ці чакалі італьянскія дыпламаты поўнага аншлагу, але ён здарыўся. Ад самага пачатку мерапрыемства, прызначанага на 18:30, на яго выстраіліся вялікія чэргі. Рэакцыі з фота і відэа з'явіліся ў сацсетках.
«Зайшла на мерапрыемства ў італьянскую амбасаду. Тут сёння раздаюць бясплатна марозіва, піцу і ліманад. Чэргі шалёныя, сваркі, вяртаюся дамоў», — напісала ўладальніца старонкі ў Threads vandrouki_minsk.
Тэма выклікала актыўную рэакцыю каментатараў:
«Калі ўбачыла, што даволі актыўна форсяць у сеціве гэтае мерапрыемства, то адразу было зразумела, што будзе нешта падобнае. Навошта гэта было амбасадзе, нават і ўявіць сабе не магу. Некалі французская амбасада праводзіла нешта такое, 21 чэрвеня, на свята пачатку лета. Дык там было поўна рознай музыкі, нейкіх адмысловых штучак на пакаштаваць. Ну і без натоўпаў, дарэчы».
«А ў чым сэнс гэтага мерапрыемства? Нейкі натоўп незразумелы».
«А там былі хоць італьянцы, каб з імі пакамунікаваць? І ці праводзяць яны штосьці, акрамя «прыходзьце паесці»?
«Таксама не зразумела, чаму не зрабілі папярэднюю рэгістрацыю».
Тыя ж, хто ўсё ж сам паўдзельнічаў у гэтым мерапрыемстве, пакідалі пазітыўныя водгукі. Так, мастачка Лілія Марозава напісала:
«Канечне ж, я не магла прапусціць такое мерапрыемства, бо гэта мая любімая краіна. І цяпер мая любоў да гэтай краіны ў выглядзе маёй інтэрпрэтацыі карціны Джаконды будзе знаходзіцца ў самога пасла… Я вельмі радая, што зоркі склаліся менавіта так. Вось суцэльна асаблівы для мяне летні вечар».
Іншая ўдзельніца вечарыны таксама дзякуе італьянскаму дыпламату, які скончыў сваю місію:
«Дзякуй вялікі за ўсё, што вы зрабілі для Беларусі. Столькі мерапрыемстваў, выстаў, столькі знаёмстваў з цудоўнымі людзьмі. Усё гэта застанецца з намі надоўга. Кавалак Італіі ў Беларусі».
Пабываў на мерапрыемстве і раней прафесійны спявак, а цяпер таксіст Аляксей Хлястоў. Ён падпісаў сумеснае з італьянскім дыпламатам фота:
«Спадар Маркеджані — вялікі шанавальнік мастацтва і чалавек з асаблівым стаўленнем да культуры. Таму асабліва каштоўна было бачыць, як мастацтва, музыка і чалавечыя зносіны здольныя аб’ядноўваць людзей».
Цяпер чытаюць
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца1414
Каментары
[Зрэдагавана]
Вот почему я уверен, что это написал Анатолий Старков? Тот же стиль.