Непадалёк ад плошчы Перамогі ў незвычайным доме прадаецца кватэра з садам пад вокнамі і месцам для барбекю
Двухпавярховыя будынкі ў раёне вуліцы Захарава па-ранейшаму лічацца элітнымі: яны знаходзяцца ў цэнтры Мінска і змяшчаюць усяго некалькі кватэр. У адным з такіх дамоў прадаецца трохпакаёвая кватэра з вінтажным балконам. У дадатак да яе ідзе ўласны сад пад вокнамі, піша Realt.by.
Вуліца Захарава — гэта ўнікальны ціхі цэнтр з прыкладамі першай пасляваеннай савецкай архітэктуры. Мясцовыя дамы лічыліся элітнымі і дагэтуль не страчваюць сваёй каштоўнасці дзякуючы размяшчэнню.
Двухпавярховая цагляная «сталінка» №34 была пабудаваная ў 1952 годзе. Тут спраектаваны ўсяго 4 кватэры. На другім паверсе цяпер прадаецца трохпакаёвая кватэра плошчай 66,1 м² з кухняй 6,5 м².
Кватэра жылая, але без сучаснага рамонту. Тут тры пакоі, адзін з іх — прахадны: праз яго можна трапіць у кухню. Таксама з гэтага пакоя ёсць выхад на зашклёны прасторны балкон, які можна ператварыць у летнюю сталовую, кабінет або зімовы сад.
Сцены ў пакоях абклееныя шпалерамі, на падлозе рознае пакрыццё, у вокнах устаноўлены шклопакеты.
Пакоі дастаткова прасторныя, у іх змяшчаюцца спальныя месцы і зоны для захоўвання рэчаў.
Сумешчаны санвузел абліцаваны пліткай. Тут устаноўлены ванна, бойлер і пральная машына.
У калідоры таксама знайшлося месца для шафаў.
У распараджэнне пакупніка пераходзіць і 15 квадратных метраў у сухім сутарэнні дома. Вырашана і галоўная праблема цэнтра горада — наяўнасць парковачных месцаў у закрытым унутраным дворыку.
Бясспрэчнай асаблівасцю гэтага жылля можна назваць палісаднік проста пад вокнамі. Агароджаная зялёная зона і невялікая колькасць суседзяў падораць адчуванне лецішча: тут кожны год квітнее сад, можна паставіць садовую мэблю, арганізаваць зону барбекю.
Дом знаходзіцца ўсяго за тры хвіліны хады ад станцыі метро «Плошча Перамогі» і цэнтральнага парку імя Горкага.
Кватэру ацанілі на 734 965 рублёў (252 895 даляраў).
Цяпер чытаюць
Галоўная рэдактарка гомельскай раёнкі пакаялася за тое, што абвінаваціла гурт «Дразды»7
Каментары