У забітага ў Белай-Падляшскай мастака Скрапецкага засталося пяцёра дзяцей, а ўдава цяжарная шостым

У забітага ў Белай-Падляшскай мастака Скрапецкага засталося пяцёра дзяцей, а ўдава цяжарная шостым. Пра гэта DW паведаміў актывіст беларускай дыяспары ў горадзе Белай-Падляшскай, які пажадаў застацца ананімным.

Ён пазнаёміўся з мастаком у 2021 годзе. Паводле яго слоў, Сямён Скрапецкі неаднаразова ўдзельнічаў у антываенных мітынгах, якія праводзілі ў горадзе беларусы і ўкраінцы. Суразмоўца DW апісаў Белую-Падляшскую як спакойны і бяспечны горад і лічыць, што Скрапецкі менавіта таму і абраў яго для жыцця.

«Усё на віду. Ты ведаеш кожную машыну, кожнага. У яго пяць дзяцей, цяпер шостым жонка цяжарная. І тут, у маленькім горадзе, пражыць вялікай сям’і прасцей», — сказаў суразмоўца DW.

Раней удава мастака Вікторыя Іваніцкая паведаміла ў сацсетках, што знаходзіцца з дзецьмі ў бяспецы пад абаронай спецслужбаў Польшчы.

Скрапецкага застрэлілі ў Белай-Падляшскай раніцай 15 чэрвеня. За тры дні да гэтага ён правёў акцыю супраць уладаў РФ каля расійскай амбасады ў Берліне. Сямён Скрапецкі (сапраўднае імя — Роберт Кузаўкоў) нарадзіўся ў Расіі ў 1981 годзе. Да 2021 года жыў у Алтайскім краі, затым, баючыся палітычнага пераследу, эміграваў у Польшчу і атрымаў там статус міжнароднай абароны.

У першую чаргу Скрапецкі быў вядомы сваімі палітычнымі карыкатурамі, у тым ліку на Уладзіміра Пуціна, Рамзана Кадырава, Аляксея Навальнага, Аляксандра Лукашэнку. Таксама ён праводзіў пратэстныя акцыі ў розных гарадах Еўропы.

12 чэрвеня мастак падышоў да чаргі на ўрачысты прыём, трымаючы ў руках карціну, дзе Іосіф Сталін калыхае прэзідэнта РФ Уладзіміра Пуціна. Ззаду ў штанах мастака была дзірка, з якой тырчаў і валокся па зямлі расійскі сцяг. Пасля Скрапецкі выкінуў яго ў сметнік.

В Польше застрелен российский художник Семен Скрепецкий. Он говорил, что ему угрожают "русские патриоты". 12 июня Скрепецкий провел акцию у посольства России в Берлине, выбросив флаг РФ в мусорный бак и показав "икону" с Путиным на руках у Сталина https://t.co/SP26zHWMwA pic.twitter.com/JCrzZEdZQJ

— DW на русском (@dw_russian) June 15, 2026

«Я думаю, пасля гэтай акцыі ў Берліне нехта аддаў загад яго ліквідаваць», — мяркуе актывіст беларускай дыяспары ў Белай-Падляшскай Андрэй (імя зменена).

У апошні раз Андрэй бачыў мастака на мінулым тыдні. У яго склалася ўражанне, што той «асцерагаецца».

Беларускі мастак-акцыяніст Улад Бохан таксама кантактаваў са Скрапецкім незадоўга да яго гібелі. Паводле яго слоў, у апошні час Скрапецкі асабліва захапіўся вулічным акцыянізмам: «Мы размаўлялі менш чым за суткі да забойства. Ён абмяркоўваў новыя ідэі, прапаноўваў нешта зрабіць разам — у Варшаве або ў Берліне. Быў настроены працаваць далей, будаваў планы».

Бохан таксама адзначае, што пагрозы суправаджалі дзейнасць мастака пастаянна: нядобразычліўцы пісалі пад кожным яго допісам.

Ён таксама звяртае ўвагу, што з-за крытычных публікацый у адрас украінскіх уладаў даныя Скрапецкага трапілі ў базу «Міратворац», дзе, акрамя апісання дзейнасці, былі апублікаваныя асабістыя звесткі, уключаючы яго адрас і акаўнты.

• 0
• 0
• 0
• 4
• 0
• 11
• 2
• 0