У Мінску адкрыўся новы рэстаран беларускай кухні — «Палюшкі» са стравамі па рэцэптах легендарнай Алены Браніславаўны
Алена Браніславаўна — стваральніца папулярнай харчэўні «Палюшкі» ў Тураве са стравамі, якія яна гатуе выключна ў печцы. Свае кулінарныя сакрэты жанчына перадала брэнд-шэфу новага рэстарана Юрыю Сароку, так што цяпер аўтэнтычныя стравы продкаў можна будзе пакаштаваць у гістарычным цэнтры Мінска — Ракаўскім прадмесці.
Асноўны канцэпт мінскіх «Палюшак» палягае на даследаванні каранёў і іх актуальным увасабленні. Нават у інтэр’еры стваральнікі імкнуліся пераасэнсаваць вясковую хату. Сцены тут выкананыя ў тэхніцы мазанкі. Печка ў цэнтры памяшкання распісаная пунсовымі макамі, сінімі валошкамі і рамонкамі — нібыта засланая рушніком. Вядома, не абышлося без дрэва, якога тут вельмі шмат, як і іншых дэталяў, якія адсылаюць да традыцыйных рамёстваў. Каманда называе ўсё гэта «неафолкам».
Што тычыцца абслугоўвання гасцей, тут хочуць зрабіць так, каб кожны наведвальнік адчуваў сябе «як дома», сярод членаў сям’і.
Для тых, хто не ведаў, палюшкі — гэта маленькія булачкі, «на адзін кусь», з дражджавога цеста, якія традыцыйна выпякаліся на Палессі. Абавязковай іх прысутнасць была на вяселлях і хрэсьбінах, але елі іх і як самастойную страву ці дадатак да супоў кожны дзень.
У новай кавярні палюшкі падаюць да баршчу, а таксама ў складзе фірмовага хлебнага кошыка.
Усе стравы паводле рэцэпту Алены Браніславаўны адзначаныя спецыяльным сімвалам-лагатыпам у выглядзе гасціннай кабеты. Гэта, напрыклад, бульбяная каўбаса са шкваркамі і тварожным сырам (32 рублі), палескія клёцкі (23 рублі), жур на аўсянай заквасцы (28 рублёў), верашчака на бурачным квасе з тоўстымі блінамі або дранікамі (49 рублёў), а таксама традыцыйная бабка з печы (29 рублёў).
Ласуны не застануцца і без дэсертаў: ад Алены Браніславаўны ў меню — тоўстыя бліны з хатнім грушавым сочывам і пламбірам. Таксама прапануецца ромавая баба з парэчкавым мусам, мядовік і марозіва. Апошняе падаюць з варэннем з шышак.
Кавярня працуе па вуліцы Віцебская, 7 з 12 гадзін дня да 23 вечара. Але ў пятніцу і суботу час адкрыцця працягнуты да 01.00.
Адзначым, што гэта ўжо не першае новае месца з беларускай кухняй за апошні час — у Беларусі цяпер назіраецца сапраўдны бум на рэстараны з традыцыйнымі стравамі.
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію99
Каментары
Ну, не буду каркаць :))) Час пакажа, што з іх бізнэсам будзе.