У бацькоў двух чалавек, якія маюць дачыненне да рэдакцыі выдання «Флагшток», ГУБАЗіК правёў ператрусы
Як піша выданне, адзін з губазікаўцаў адкрыта заявіў, што падобныя дзеянні будуць працягвацца да таго часу, пакуль на рэсурсе будуць выходзіць новыя публікацыі.
Учора, 19 траўня, у Беларусі адбыліся ператрусы ў бацькоў двух чалавек, якія маюць дачыненне да гомельскага незалежнага выдання «Флагшток».
«Рэдакцыя разглядае гэтыя дзеянні сілавых структур у кантэксце падзей апошніх гадоў — з 2022 года Гомельская вобласць апынулася ўцягнутай у вайсковую актыўнасць у сувязі з вайной Расіі супраць Украіны. Не выключана, што на фоне магчымай эскалацыі сітуацыі адбываецца спроба загадзя зачысціць інфармацыйную прастору ад незалежных і непадкантрольных медыя», — гаворыцца ў заяве выдання.
Рэдакцыя дадае, што «Флагшток» — гэта не адзін і не два чалавекі. За шэсць гадоў працы вакол медыя сфармавалася вялікая каманда. Хтосьці пакінуў праект, далучыліся новыя людзі, і каманда працягвае рэгулярна абнаўляцца і развівацца.
Некаторыя з заснавальнікаў ужо даўно працягваюць свой шлях і паспяхова рэалізуюць сябе незалежна ад «Флагштока».
«Таму ціск на канкрэтных людзей можа разглядацца толькі як чарговая спроба запалохвання і ціску на незалежныя медыя ў Беларусі», — піша выданне.
Гомельскае медыя «Флагшток» паўстала ў 2020 годзе дзякуючы грамадскай ініцыятыве, якая выступіла супраць будаўніцтва ў Гомелі 60‑мятровага флагштока за паўмільёна долараў. І хаця канструкцыя ўсё ж такі з’явілася, жыхары Гомельшчыны атрымалі незалежнае выданне, якое асвятляе рэзанансныя падзеі рэгіёна і робіць журналісцкія расследаванні.
У выніку пратэсны праект урбаністаў ператварыўся ў паспяховае выданне з эксклюзівамі і інсайдамі пра Гомель і вобласць.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары
[Зрэдагавана]