Мінчанкі заплацілі па 100 рублёў, каб з раскошай паглядзець «Д'ябал носіць Prada 2». Але ўсю раскошу атрымалі толькі блогеры
У скандальную сітуацыю трапіў кінатэатр Skyline Cinema.
Сваім абурэннем у Threads падзялілася мінчанка Наталля. Яна вырашыла пайсці на закрыты паказ новага фільма «Д'ябал носіць Prada 2». Квіткі, дарэчы, былі зусім не бюджэтныя — па 100 рублёў.
Але ж і праграма мерапрыемства выглядала даволі прывабна: спачатку актыўнасці і падарункі ад спонсараў, потым лекцыя на паўтары гадзіны пра стыль (ад адзення да макіяжу), а пасля ўжо і сам фільм.
Запрасілі таксама шмат блогераў. І высветлілася, што для іх праграма іншая.
Вось як гэта апісвае Наталля: «Прыехалі ў 18.35, вельмі шмат было блогераў і людзей па запрашэннях, фатаграфуюцца, п'юць шампанскае і кактэйлі. Побач са стойкай бара сказалі, што патрэбны жэтон на шампанскае. Схадзілі, узялі».
Не блогерам падарылі папкорн, шкарпэткі Conte, паштоўкі з кадрамі фільма ды па бакале шампанскага.
Далей публіку запрасілі ў залі. Але ў першай — куды адправілі блогераў, якія прыйшлі бясплатна — для іх выступалі з лекцыяй і прэзентацыяй стылісты. У другой жа залі, куды трапілі звычайныя людзі, проста прапанавалі скачаць тую прэзентацыю па QR-кодзе.
Фактычна аўдыторыя сумавала паўтары гадзіны. Наталля адзначае, што адчувалі сябе ўсе вельмі непрыемна: «Так, у нас няма тысяч падпісчыкаў, але мы купілі квіткі». Нехта нават сышоў, не дачакаўшыся пачатку фільма. Гучалі прапановы падаць калектыўную скаргу.
Допіс Наталлі завірусіўся. Каментатары абураюцца: маўляў, атрымліваецца, што простыя людзі аплацілі імпрэзу для блогераў, але пры гэтым яшчэ і атрымалі такое зняважлівае стаўленне да сябе.
У хуткім часе жанчына паведаміла, што з ёй звязаліся прадстаўнікі кінатэатра і прапанавалі альбо вярнуць грошы за квіток, або запрасіць яе на нейкае іншае мерапрыемства. Наталля выбрала грошы.
Публічна Skyline Cinema таксама прыйшлося выбачацца. Яны дадалі, што партнёры мерапрыемства не мелі ніякага дачынення да таго, што адбывалася пасля падзелу публікі па залах.
А пра адсутнасць лекцыі ў другім залі распавялі, што там не атрымалася запусціць прэзентацыю на экране.
Цяпер жа заклікаюць незадаволеных гасцей да дыялогу і просяць патэлефанаваць або напісаць ім на пошту — каб асабіста абмеркаваць уражанні.
Але ж у каментарах да допісу з выбачэннем людзі працягваюць абурацца. Нехта пажартаваў, што пасля такой памылкі маркетолагаў іншыя кінатэатры могуць некалькі месяцаў не траціць бюджэт на рэкламу.
Тым часам Skyline Cinema у інстаграме рэпосціць сторыс блогераў, якія, канешне, засталіся ўсім задаволеныя — і кідаюць камяні ў людзей, якія раскрытыкавалі мерапрыемства. Гэта выклікала новую хвалю абурэння ў сацсетках.
Каментары