Кампаніі ўкараняюць ШІ-двайнікоў супрацоўнікаў

Кампаніі пачалі выкарыстоўваць лічбавых двайнікоў супрацоўнікаў, каб павысіць прадукцыйнасць і знізіць залежнасць ад найму, піша devby.io. Адзін з такіх прыкладаў — Рычард Скелет, галоўны аналітык па даследаваннях і дызайне кансалтынгавай фірмы Bloor Research. У інтэрв'ю BBC ён распавёў, што за тры гады стварыў лічбавую копію самога сябе. Тэхналагічна «лічбавы Рычард» — гэта персанальная ШІ-мадэль, навучаная на працоўных даных канкрэтнага чалавека.

Двайнік навучаны на сустрэчах, дакументах і перапісцы і пераймае стыль мыслення ўладальніка, дапамагаючы прымаць рашэнні і рыхтаваць прэзентацыі. У выніку атрымаўся тэкставы інтэрфейс — па сутнасці, чат з уласнай лічбавай копіяй, да якой можна звяртацца па парады, аналітыку і дапамогу.

У сістэмы ёсць асобныя ўкладкі, напрыклад «family» і «admin», доступ да якіх закрыты для калег — яны могуць звяртацца да лічбавага двайніка толькі па бізнэс-пытаннях.

З часам «лічбавы Рычард» стаў асновай для маштабавання тэхналогіі ўнутры Bloor Research: па яго мадэлі стварылі лічбавых двайнікоў для ўсёй каманды з прыкладна 50 супрацоўнікаў у Вялікабрытаніі, Еўропе, ЗША і Індыі.

У Bloor Research кажуць, што тэхналогія дапамагае ў кадравай палітыцы: напрыклад, паступова выводзіць людзей на пенсію або часова замяняць калег — без найму часовых супрацоўнікаў. Яшчэ 20 іншых кампаній ужо тэстуюць гэтую тэхналогію, і яна будзе шырока даступная іншым у канцы гэтага года.

Падобны падыход выкарыстоўвае Джош Берсін, заснавальнік кансалтынгавай кампаніі The Josh Bersin Company. Ён называе гэтую тэхналогію «суперработнікам» — калі ШІ ўзмацняе магчымасці чалавека. «У людзей няма сіл на яшчэ адзін званок. Але вы можаце разбудзіць лічбавага двайніка пасярод ночы і гаварыць з ім гадзіну — яму ўсё роўна. Гэта неверагодна каштоўна», — тлумачыць ён.

Па словах Берсіна, дзякуючы лічбавым копіям супрацоўнікаў кампанія расце прыкладна на 30% у год, але пры гэтым наймае ўсяго аднаго-двух новых спецыялістаў штогод. «Эканамічная каштоўнасць кожнага чалавека расце. Калі вы становіцеся каштоўным лічбавым элементам кампаніі, чаму б ёй не плаціць вам больш?» — дадае ён.

Аднак разам з перавагамі ўзнікаюць і сур'ёзныя пытанні. Эксперты спрачаюцца аб тым, каму належыць лічбавы двайнік — супрацоўніку ці працадаўцу, і хто нясе адказнасць за яго дзеянні.

«Як толькі ШІ навучаецца на лістах, сустрэчах і працоўных матэрыялах чалавека, вы сутыкаецеся з пытаннямі, якія ляжаць у самым цэнтры працоўных адносін: згода, кантроль персанальных даных, замяшчэнне працы і тое, што адбываецца, калі чалавек сыходзіць з кампаніі», — адзначае юрыст Анджалі Малік з Bellevue Law.

Аналітыкі Gartner прагназуюць, што лічбавыя двайнікі супрацоўнікаў могуць стаць масавай з'явай ужо ў найбліжэйшы час. Але пакуль рынак толькі фармуецца, і прававыя нормы не паспяваюць за тэхналогіяй. «Думаю, мы, хутчэй за ўсё, спачатку ўбачым негатыўны бок гэтага медаля, перш чым праявіцца станоўчы», — папярэджвае даследчыца Gartner Кейлін Лоўмастэр.

• 0
• 1
• 3
• 1
• 2
• 0
• 2
• 0