«Мне здаецца, гэта крымінальны артыкул». Пінчук абурыўся станам новай дарогі ў горадзе
Жыхары Пінска паскардзіліся на стан дарогі каля гандлёвага цэнтра. Ямы і расколіны з'явіліся ўсяго праз год пасля рамонту, піша BGmedia.
Жыхар горада запісаў відэаролік, у якім эмацыйна выказаўся пра стан новай дарогі каля гандлёвага цэнтра. Паводле яго слоў, пакрыццё ўсяго за год прыйшло ў такі стан, што «па ім проста немагчыма ехаць».
«Я, вядома, дзіка прашу прабачэння, але як дарога каля гандлёвага цэнтра, усім вядомага і ўсімі любімага ў горадзе Пінску, за адзін год ператварылася вось у такі стан, па якой проста немагчыма ехаць. Гэта ж як яе трэба было рабіць і з чаго? І чаму ніхто зараз не бяжыць, не ратуе яе, не рамантуе? Мне здаецца, гэта крымінальны артыкул, не? Як вы думаеце? Я не ведаю».
Паводле слоў мужчыны, гаворка ідзе пра дарогу, якая яшчэ нядаўна лічылася новай. Цяпер жа — ямы, расколіны і няроўнасці.
Асабліва праблемным кіроўцы называюць паварот направа: там, як пішуць у каментарах, «канкрэтная яма, і далей метраў 50 — зубадрабілка».
Пад відэа хутка з'явіліся дзясяткі каментароў.
Многія сцвярджаюць, што праблема не лакальная.
«Ды ў Пінску па ўсім горадзе так».
«У Пінску ад дарог толькі назва».
«Асфальт сышоў разам са снегам».
«Згодны, трэба ўжо саджаць за такую якасць. Чаму няма нагляду?»
«Гэта паласа перашкод з незразумелай разметкай».
Некаторыя дзеляцца асабістым вопытам. Адзін з кіроўцаў піша, што «ўчора выявіў, што два колы ўгробіў, проста сталі крывыя, далей горада нікуды не ездзіў».
Іншы дадае: «Ехаў там — і сам быў у шоку. За год — і ўсё, капец дарозе».
Частка каментатараў лічыць, што справа ў парушэнні тэхналогіі будаўніцтва.
Людзі іранізуюць: «Вырашылі сэканоміць на бетоне, але нешта пайшло не так», «Тэхналогія, галоўнае — была выкананая работа і справаздача».
Іншыя вінавацяць зіму і рэагенты. На думку аднаго з карыстальнікаў, бетон «забівае соль, якой пасыпаюць дарогу».
Не абышлося і без сарказму: «У Пінску дарогі робяць толькі ў жахлівых умовах надвор'я, калі дождж ідзе». «Затое ўсе дрэвы спраўна спілавалі ў тым раёне».
Жыхары горада ўсё часцей кажуць пра тое, што стан дарог у Пінску — хранічная тэма.
«У каго ні спытаю пра Пінск, усе кажуць: што гэта за дарогі ў вас?» — піша адзін з каментатараў.
-
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю
-
Юліяна Шаметавец з «Кіберпартызанаў» стала маці — расказвае пра дэкрэтны адпачынак у ЗША і тое, ці сапраўды можна сумяшчаць працу з мацярынствам
-
Каверын выбачыўся за прапанову эратычнай фотасесіі для Ціханоўскай
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары