Рост цэн на срэбра прымусіў папулярнага вытворцу ювелірных вырабаў Pandora перайсці на плаціну
Кампанія Pandora, вядомая сваёй канцэпцыяй «даступнай раскошы», вымушана змяніць тэхналогію вытворчасці знакамітых бранзалетаў і падвесак, выкарыстоўваючы плацінавае пакрыццё замест чыстага срэбра. Як піша The New York Times, гэты крок — спроба абараніць бізнэс не толькі ад анамальных цэн на сыравіну, але і ад ціску высокіх мытных пошлін ды агульнага зніжэння спажывецкага попыту.
Pandora — найбуйнейшы ювелірны брэнд у свеце паводле аб’ёмаў вытворчасці — штогод закупляе больш за 300 тон срэбра, але цяпер вымушана змяняць стратэгію праз анамальны рост цэн. За апошні год срэбра падаражэла ўдвая, дасягнуўшы 80 даляраў за ўнцыю, што стала значна больш балючым ударам для бізнэс-мадэлі кампаніі, чым рост цэн на золата.
Каб захаваць статус «даступнай раскошы», у пачатку лютага брэнд заявіў пра запуск лінейкі вырабаў з плацінавым пакрыццём, якая павінна зменшыць залежнасць ад дарагога стэрлінгавага срэбра.
Выбар на карысць плаціны абумоўлены яе стабільнасцю: хоць гэты метал каштуе каля 2100 даляраў за унцыю, з пачатку года ён падаражэў усяго на 3%. Гэта непараўнальна з двухзначным працэнтным ростам срэбра за той жа перыяд.
Таму ўжо праз год Pandora плануе перавесці на новую тэхналогію як мінімум палову сваёй срэбранай прадукцыі. Такі крок дазволіць кампаніі «нівеліраваць значную частку» выдаткаў на сыравіну, выкарыстоўваючы плацінавае напыленне на больш танныя металічныя сплавы.
Генеральная дырэктарка Pandora Берта дэ Паблос-Барб’ер, якая ўзначаліла кампанію ў пачатку года, прызнае, што празмерная залежнасць ад аднаго віду сыравіны стала сур’ёзнай фінансавай рызыкай. Паводле яе слоў, папярэднія ваганні цэн на срэбра занадта моцна ўплывалі на прыбытковасць, таму дыверсіфікацыя матэрыялаў неабходная для стабільнасці бізнэсу ў будучыні.
Як адзначае NYT, гэтая рэарганізацыя адбываецца на фоне слабай спажывецкай кан’юнктуры, асабліва ў ЗША, дзе ў канцы мінулага года продажы істотна запаволіліся. За мінулы год выручка кампаніі склала 5,1 млрд даляраў, павялічыўшыся толькі на 2% у супастаўных цэнах, а вось агульны прыбытак фактычна не змяніўся. Больш за тое, прагноз на бягучы год прадугледжвае амаль нулявы рост продажаў, што прымушае кіраўніцтва шукаць шляхі аптымізацыі выдаткаў.
Дадатковым выпрабаваннем стала мытная палітыка адміністрацыі Дональда Трампа, бо Pandora вырабляе свае ўпрыгожванні ў Тайландзе, а амерыканскі рынак з’яўляецца для яе ключавым. Увядзенне 20‑працэнтных мытаў на імпарт з Тайланда і В’етнама, дзе кампанія якраз рыхтуе новыя вытворчыя магутнасці, стварыла новыя фінансавыя бар’еры і прымусіла інвестараў больш насцярожана ставіцца да акцый брэнда.
Нягледзячы на ўсе выклікі, кіраўніцтва Pandora супакойвае пакупнікоў: якасць вырабаў нават палепшыцца, бо плацінавае пакрыццё больш устойлівае да карозіі і не цямнее з часам. Гэта дазволіць насіць упрыгожванні нават падчас адпачынку на моры, пры гэтым галоўная мэта кампаніі застаецца нязменнай — захаваць цэннікі на звыклым для спажыўцоў даступным узроўні.
Цяпер чытаюць
«Рэтранслятары выключыць, зняць і паказаць нам, што яны знятыя». Зяленскі патлумачыў, чаму паставіў ультыматум і што мае зрабіць Мінск27
Каментары