«Прывет, дарагая, гэта Аляксей Хлястоў». Нехта стварыў фэйкавы акаўнт спевака
У TikTok з'явіўся фэйкавы акаўнт спевака Аляксея Хлястова. Яго стваральнікі выдаюць сябе за артыста, пішуць жанчынам ад яго імя і спрабуюць перавесці размову ў Telegram. Хлястоў папярэдзіў падпісчыкаў, што за старонкай стаіць не ён і, імаверна, гаворка ідзе пра махлярскую схему.
«Прывет, дарагая, гэта Аляксей Хлястоў напісаў табе», — так пачынаецца адно з паведамленняў, адпраўленых ад імя спевака.
Фэйкавая старонка ў TikTok капіюе сацсеткі Хлястова: там выкарыстоўваюць яго імя, фота і відэа.
Сярод іншага, на ёй апублікавалі створаную з дапамогай штучнага інтэлекту песню пра «чорна-белы Мінск» на тэму мігрантаў.
Пасля кантакту ў TikTok суразмоўцам прапануюць перайсці ў Telegram. Хлястоў звярнуў увагу, што там ад яго імя могуць выманьваць грошы, прапаноўваць сумнеўныя схемы і «розыгрышы» або спрабаваць атрымаць асабістыя звесткі.
«Людзі, якія стварылі гэты акаўнт, размаўляюць нібыта ад майго імя і прапануюць сваім абанентам перайсці на нейкі Telegram-акаўнт. Ні ў якім разе не пераходзьце ні па якіх спасылках, не вядзіцеся на размовы і на тое, што піша чалавек, нібыта гэта я», — папярэдзіў спявак.
Ён таксама папрасіў падпісчыкаў паскардзіцца на фэйкавы профіль у TikTok.
Аляксей Хлястоў — адзін з вядомых беларускіх эстрадных спевакоў. Апошнія гады ён фактычна пазбаўлены магчымасці працаваць па прафесіі. Раней «Наша Ніва» пісала, што з канца 2021 года Хлястоў не можа выступаць з канцэртамі. У 2023 годзе стала вядома, што артыст трапіў у «чорны спіс» і яму забаронена выступаць нават на карпаратывах. У выніку Хлястоў пайшоў працаваць таксістам.
У маі 2026 года спевака затрымалі. Ён трапіў на Акрэсціна, атрымаў 14 сутак адміністрацыйнага арышту за «дробнае хуліганства».
Цяпер чытаюць
«Чакаем у Мінску +1 славутасць!» Блогераў прывезлі ў былую турму на Валадарскага20
Каментары