Праз 30 гадоў суд назваў вінаватага ў забойстве Тупака Шакура — аднаго з самых уплывовых рэпераў у гісторыі
Прысяжныя ў Лас-Вегасе прызналі 63‑гадовага Дуэйна «Кіфі Дзі» Дэвіса вінаватым у забойстве рэпера Тупака Шакура, аднаго з самых вядомых выканаўцаў у гісторыі хіп-хопа. Шакура застрэлілі ў 1996 годзе, але абвінавачаны ў яго забойстве з'явіўся толькі праз 27 гадоў. Цяпер Дэвісу пагражае пажыццёвае зняволенне, піша Бі-бі-сі.
Тупаку Шакуру было 25 гадоў, калі 7 верасня 1996 года ў Лас-Вегасе абстралялі аўтамабіль, у якім ён ехаў разам з кіраўніком гуказапісвальнага лэйбла Death Row Records Мэрыянам «Шугам» Найтам. Побач з іх BMW на святлафоры спыніўся белы Cadillac, з якога адкрылі агонь. Шакур атрымаў цяжкія раненні і памёр у бальніцы 13 верасня. Найт выжыў.
Забойства аднаго з самых вядомых рэпераў 1990‑х заставалася нераскрытым дзесяцігоддзямі.
Паводле версіі абвінавачання, напад быў помстай за бойку, якая адбылася незадоўга да страляніны. Шакур і людзі з яго атачэння збілі ў казіно Арланда Андэрсана — пляменніка Дуэйна Дэвіса і ўдзельніка банды South Side Compton Crips.
Пракуроры сцвярджалі, што пасля гэтага Дэвіс здабыў пісталет, сабраў яшчэ трох мужчын і адправіўся шукаць Шакура. Калі яны знайшлі яго машыну, Дэвіс, паводле абвінавачання, перадаў зброю на задняе сядзенне Cadillac, пасля чаго адзін з мужчын адкрыў агонь.
Хто менавіта страляў у Тупака, следства так і не ўстанавіла.
У выдадзеных у 2019 годзе мемуарах Дэвіс напісаў, што знаходзіўся ў Cadillac, з якога стралялі ў Шакура, і перадаў пісталет чалавеку на заднім сядзенні. Ён таксама неаднаразова гаварыў пра забойства ў інтэрв'ю, падкастах і дакументальных фільмах.
Менавіта гэтыя заявы сталі важнай часткай доказаў абвінавачання. Паліцыя сцвярджае, што падазравала Дэвіса даўно, але раней не мела дастаткова доказаў для прад'яўлення абвінавачання. Яго арыштавалі ў 2023 годзе — праз 27 гадоў пасля забойства рэпера.
Абарона настойвала, што гісторыі Дэвіса былі перабольшаныя дзеля вядомасці і продажу кнігі. Сам ён сваёй віны не прызнаў і пасля вердыкту заявіў, што збіраецца яго абскардзіць.
Прысяжным спатрэбілася каля трох гадзін, каб прызнаць Дэвіса вінаватым у забойстве першай ступені з выкарыстаннем зброі. Яму пагражае пажыццёвае зняволенне без магчымасці датэрміновага вызвалення. Прысуд маюць абвясціць 13 кастрычніка.
Дэвіс застаецца адзіным жывым з чатырох мужчын, якія, паводле следства, знаходзіліся ў Cadillac. Яго пляменнік Арланда Андэрсан загінуў у перастрэлцы ў 1998 годзе, яшчэ двое мужчын таксама памерлі.
-
«Каб увесь свет гаварыў па-руску, вывучайце аўтамат Калашнікава». У Расіі ўдзельнік вайны даў наказ школьнікамі 1 верасня
-
Латвія з 1 верасня забараніла адусюль увоз беларускіх кніг, адзення і цацак
-
У Румыніі, Эстоніі і Латвіі абвяшчалі паветраную трывогу і падымалі знішчальнікі НАТА праз беспілотнікі
Цяпер чытаюць
«Чакаем у Мінску +1 славутасць!» Блогераў прывезлі ў былую турму на Валадарскага19
Каментары