Лукашэнка запрасіў кіраўніка Лаоса ў Беларусь. Той прапанаваў разам здабываць золата
Аляксандр Лукашэнка сустрэўся ў Бішкеку з прэзідэнтам Лаоса Тханглунам Сісулітам і запрасіў яго наведаць Беларусь. У адказ кіраўнік Лаоса прапанаваў беларускаму боку ўдзельнічаць у здабычы карысных выкапняў і пабудаваць у яго краіне завод па перапрацоўцы золата.
Сустрэча адбылася 1 верасня на палях саміту Шанхайскай арганізацыі супрацоўніцтва.
Лукашэнка заявіў, што Беларусі і Лаосу варта больш інтэнсіўна развіваць адносіны. Сярод магчымых кірункаў ён назваў машынабудаванне — не толькі продаж беларускай тэхнікі, але і стварэнне сумесных прадпрыемстваў.
Ён таксама прапанаваў перадаваць Лаосу беларускія тэхналогіі і навучаць мясцовых спецыялістаў. Акрамя таго, Беларусь гатовая пастаўляць прадукты харчавання і прымаць лаоскіх дзяцей на аздараўленне.
У адказ Тханглун Сісуліт прапанаваў супрацоўніцтва ў здабычы карысных выкапняў, перадусім золата.
«Мы можам супольна працаваць у галіне здабычы карысных выкапняў, золата. Мы маглі б разам пабудаваць завод па перапрацоўцы золата. Такое прадпрыемства ў нас ужо ёсць, але мы можам пабудаваць яшчэ адно. Нам вельмі хацелася б супрацоўнічаць з вамі ў гэтай сферы, у вас вельмі багаты досвед», — заявіў кіраўнік Лаоса.
Ён запрасіў беларускіх спецыялістаў прыехаць у Лаос і вывучыць іншыя магчымыя кірункі супрацоўніцтва.
«Мы чакаем інвестыцый ад Беларусі. У нас шмат рэсурсаў, і мы гатовыя дзяліцца прыбыткам», — дадаў Сісуліт.
Напрыканцы сустрэчы Лукашэнка запрасіў кіраўніка Лаоса наведаць Беларусь у зручны для яго час.
Цяпер чытаюць
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1414
Каментары