Каранік пра ідэю айчыннага электракара: Трошкі пераацанілі свае магчымасці
«Спроба свае напрацоўкі з ходу інтэграваць у былую бензінавую машыну, на жаль, не прывяла да добрага спажывецкага выніку».
Кіраўнік Акадэміі навук Беларусі Уладзімір Каранік расказаў на «Беларусь 1», што цяпер з ідэяй стварыць першы цалкам беларускі электракар.
«Прататып насамрэч ёсць. Але першапачаткова гаворка ішла, навуковая праграма была аб стварэнні кампанентнай базы электратранспарту. Задача была ў тым, каб для нашых вытворцаў падрыхтаваць айчынную кампанентную базу: электрарухавікі, рэдуктары, інвертар.
Задача стварыць аўтамабіль у цэлым — напэўна, трошкі пераацанілі свае магчымасці. Не да канца ўсведамлялі, што пасажырскі аўтамабіль — гэта ўсё ж такі вельмі шмат сістэм бяспекі, гэта мультымедыя, гэта сілавы каркас. І спроба свае напрацоўкі з ходу інтэграваць у былую бензінавую машыну, на жаль, не прывяла да добрага спажывецкага выніку».
Айчынныя электракары былі б запатрабаваныя, лічыць Каранік.
«Гэта аўтамабілі спецыяльнага прызначэння, камунальная тэхніка. Гэта экскурсійны аўтобус для Батанічнага сада, які зараз праектуецца і будзе вырабляцца. Электратранспарт складскі, электракары для аэрапортаў. Мы знайшлі сваю нішу».
Кіраўнік НАН дадаў, што ёсць жа айчынны электрамабіль ад «БелДжы».
«Вельмі добрая мадэль з вельмі добрымі спажывецкімі якасцямі, магу сказаць як карыстальнік, які мае досвед. І наша задача зараз выкарыстоўваць свае кампетэнцыі, каб павялічыць працэнт лакалізацыі айчынных распрацовак, а не зрабіць машыну з нуля», — сказаў Каранік.
Завод «БелДжы» ў траўні 2025 года паказаў электрамабіль Geely EX-5. Але пазней адмовіўся ад ідэі яго серыйнага выпуску — запуск гэтай мадэлі занадта дарагі для Беларусі.
Нагадаем, што ў лістападзе стала вядома, што Камітэт дзяржаўнага кантролю выявіў карупцыйныя схемы ў структурах Нацыянальнай акадэміі навук Беларусі. Сярод фігурантаў — супрацоўнікі, звязаныя з распрацоўкай першага айчыннага электрамабіля.
Цяпер чытаюць
Адстаўны міністр-карупцыянер прадае рэспектабельны катэдж каля Драздоў. Просіць $2 мільёны6
Каментары