Вялікія белыя акулы ў Міжземным моры апынуліся на мяжы знікнення. Паводле высноў амерыканскіх навукоўцаў, якія працавалі разам з брытанскай экалагічнай арганізацыяй Blue Marine Foundation, галоўнай пагрозай для гэтых драпежнікаў застаецца незаконны вылаў, паведамляе Бі-бі-сі.
Даследчыкі паведамляюць, што толькі ў 2025 годзе каля ўзбярэжжа Паўночнай Афрыкі было забіта не менш за 40 вялікіх белых акул. Хоць гэты від, як і яшчэ больш за дваццаць відаў міжземнаморскіх акул, знаходзіцца пад міжнароднай аховай і яго вылаў ды продаж забароненыя, акулы працягваюць з’яўляцца на мясцовых рынках.
Журналісты праверылі відэа з сацыяльных сетак і пацвердзілі іх сапраўднасць: на кадрах бачна, як мёртвых акул выгружаюць у рыбалоўных партах Паўночнай Афрыкі. У Алжыры, напрыклад, зафіксавалі дастаўку вялікай белай акулы, а ў Тунісе — падрыхтоўку да продажу частак акулы-мако, якая таксама знаходзіцца пад пагрозай знікнення.
Кіраўнік даследавання, марскі біёлаг Франчэска Ферэці з універсітэта Virginia Tech, адзначае, што колькасць акул у Міжземным моры, асабліва белых, за апошнія дзесяцігоддзі катастрафічна скарацілася. Паводле яго слоў, ні ў адным іншым марскім рэгіёне свету няма такога інтэнсіўнага прамысловага рыбалоўства. Міжнародны саюз аховы прыроды адносіць міжземнаморскую папуляцыю вялікай белай акулы да катэгорыі «ў крытычнай небяспецы».
Сёлета навукоўцы спрабавалі знайсці акул у праліве паміж Сіцыліяй і Тунісам, які лічыцца адным з апошніх прытулкаў рэдкіх відаў. На працягу двух тыдняў яны выкарыстоўвалі прынады, падводныя камеры і аналіз ДНК у марской вадзе, але змаглі зафіксаваць толькі адну блакітную акулу. Вялікіх белых акул знайсці не ўдалося.
Адначасова даследчая група атрымлівала новыя звесткі пра гібель белых акул у рыбалоўных раёнах Паўночнай Афрыкі, у тым ліку побач з месцамі правядзення даследаванняў. Навукоўцы падкрэсліваюць, што такія страты асабліва небяспечныя для ўжо вельмі малалікай папуляцыі.
Эколагі звяртаюць увагу, што, нягледзячы на міжнародныя забароны, узровень аховы акул істотна адрозніваецца ў розных краінах, а праблема выпадковага ўлову застаецца нявырашанай. У бедных прыбярэжных супольнасцях рыбакі часта вымушаныя выбіраць паміж захаваннем рэдкіх відаў і неабходнасцю зарабляць на жыццё.
Бурая гіена, альпійскі казярог, эмбрыён насарога. У Вялікабрытаніі падвялі вынікі конкурсу на найлепшыя фоты дзікай прыроды
У Аўстраліі акула напала на падлетка. Яго выратавалі адважныя сябры
Навукоўцы ўпершыню зафіксавалі аранжавую акулу-няньку ФОТА
Навукоўцы паказалі ВІДЭА, як васьміног катаецца на самай хуткай у свеце акуле
Цяпер чытаюць
«Засяроджуся на працы з ЗША». Ціханоўскі расказаў пра свае палітычныя планы на 2026 год20
Каментары