У Добрушы школьны прыбіральшчык вырабіў сметніцу з парасонам і сабачкам ФОТАФАКТ
Пенсіянер Леанід Піліпенка ўсё жыццё працаваў мастаком на Добрушскім фарфоравым заводзе. А пасля выхаду на пенсію не захацеў заставацца дома без справы і ўладкаваўся ў сярэднюю школу №3 прыбіральшчыкам. Але творчыя задаткі праявіліся і тут, піша мясцовая раёнка «Добрушскі край».
На ўваходзе ў школу мужчына сваімі рукамі зрабіў арыгінальную сметніцу. Гэта не звычайная металічная канструкцыя, а сапраўдны маленькі твор мастацтва: сметніца вяглядае як элегантны джэнтльмен у фраку з гальштукам-бабачкай, а над ёй размешчаны парасон. Побач майстар прымацаваў тонкі павадок, да якога прычэплены маленькі сабачка.
Леанід Піліпенка прызнаецца, што галоўная мэта гэтай працы — парадаваць дзяцей, якія кожны дзень прыходзяць у школу. Каб зрабіць незвычайную сметніцу, ён выкарыстаў падручныя матэрыялы: трубы ад старых спісаных крэслаў, кавалкі арматуры, што знайшліся дома. З гэтых, здавалася б, нікому не патрэбных рэчаў і з’явілася арыгінальная канструкцыя.
Цяпер чытаюць
Што вядома пра экс-афіцэра Службы бяспекі Лукашэнкі Андрэя Спасава, якога пасадзілі за палітыку1
Каментары