Крот-шахцёр, багамол-пераростак і крэйсер «Аўрора». На палях Беларусі зладзілі конкурс фігур з саломы ФОТЫ і ВІДЭА
Стварэнне фігур і кампазіцый з цюкоў саломы ў Беларусі ператварылася ў цэлую восеньскую традыцыю. Без замкаў, трактароў і паравозікаў, якія з'яўляюцца на ўзбочынах аўтамабільных трас на ўбраных палях, вось ужо некалькі гадоў як не абыходзіцца падрыхтоўка да галоўнага свята беларускіх аграрыяў — «Дажынак». У адным з рэгіёнаў краіны сёлета зладзілі не ўмоўны, а самы сапраўдны конкурс саламяных арт-аб'ектаў. Выданне Telegraf.news сабрала фота і відэа ўдзельнікаў і даведалася, які прыз паабяцалі пераможцам.
Абласны агляд-конкурс абвясцілі ўлады Мінскай вобласці. Заяўкі на найлепшую саламяную фігуру або кампазіцыю прымалі да 1 верасня, а з 10 па 17 верасня паабяцалі запусціць інтэрнэт-галасаванне.
Пераможцам паабяцалі не толькі публічнае прызнанне і дыплом, які ўручаць на абласных «Дажынках», якія сёлета прадуць у Заслаўі, але і матэрыяльныя прызы: па 70, 60 і 50 базавых велічынь (гэта значыць 2940, 2520 і 2100 рублёў) за 1, 2 і 3 месца, адпаведна, па версіі ацэначнай камісіі; яшчэ 50 базавых (2100 рублёў)-пераможцу інтэрнэт-галасавання.
Сярод канкурсантаў, якія засвяціліся ў афіцыйным тэлеграм-канале Мінскага аблвыканкама — як ужо звыклыя для беларусаў замкі, трактары з самалётамі і жывёлы, так і даволі нестандартныя варыянты.
Напрыклад, спецыялісты аднаго з прадпрыемстваў стварылі на полі цэлы лабірынт.
А пад Салігорскам іншае прадпрыемства «выляпіла» з цюкоў вельмі сімвалічную для рэгіёну постаць — крата-шахцёра.
Ці арганізоўвалі афіцыйна падобны конкурс у іншых абласцях Беларусі — невядома, аднак, мяркуючы па відэа з сацсетак, як мінімум у віртуальнае спаборніцтва на званне самай арыгінальнай скульптуры з саломы ўключыліся практычна ўсе рэгіёны.
Так, на Брэстчыне на палях аднаго з аграпрадпрыемстваў з'явіўся легендарны крэйсер «Аўрора» ў натуральную велічыню (ну, амаль). Падабенства з арыгіналам адзначылі многія каментатары, прычым некаторыя нават выказалі на гэты конт некаторую занепакоенасць.
«Ну вось што вы нарабілі? Цяпер яны паглядзяць з космасу і скажуць, што ў нас з'явілася новая распрацоўка — сухапутныя крэйсеры», — жартам паўшчувала аўтараў скульптуры адна з глядачак.
Кампазіцыю іншага сельгаспрадпрыемства Брэсцкай вобласці ў тыктоку назвалі «самай душэўнай». Яе аўтары стварылі «дом бацькоў», які «не прадаецца», чым выклікалі прыступ замілавання ў дзясяткаў гледачоў.
Тыя, хто асабіста пабываў на гэтай «бацькаўшчыне», асабліва адзначылі ўвагу стваральнікаў да дэталяў.
«Брэсцкая вобласць сёлета замарочылася. Там нават курачкі з сена», — напісала адна з карыстальніц тыктока.
Мяркуючы па іншых відэа і фота ў сацсетках, дзесьці на прасторах беларускіх палёў уздоўж трас сёння можна таксама сустрэць сапраўднага (ну, амаль) дыназаўра, гіганцкага багамола і вельмі жахлівага павука, які камусьці з гледачоў нагадаў Арагога з сусвету Гары Потэра.
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу5
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары
Мабыць, адзін аўтар. Ён пацешыў :)