Krot-šachcior, bahamoł-pierarostak i krejsier «Aŭrora». Na palach Biełarusi zładzili konkurs fihur z sałomy FOTY i VIDEA
Stvareńnie fihur i kampazicyj ź ciukoŭ sałomy ŭ Biełarusi pieratvaryłasia ŭ cełuju vosieńskuju tradycyju. Biez zamkaŭ, traktaroŭ i paravozikaŭ, jakija źjaŭlajucca na ŭzbočynach aŭtamabilnych tras na ŭbranych palach, voś užo niekalki hadoŭ jak nie abychodzicca padrychtoŭka da hałoŭnaha śviata biełaruskich ahraryjaŭ — «Dažynak». U adnym z rehijonaŭ krainy sioleta zładzili nie ŭmoŭny, a samy sapraŭdny konkurs sałamianych art-abjektaŭ. Vydańnie Telegraf.news sabrała fota i videa ŭdzielnikaŭ i daviedałasia, jaki pryz paabiacali pieramožcam.
Abłasny ahlad-konkurs abviaścili ŭłady Minskaj vobłaści. Zajaŭki na najlepšuju sałamianuju fihuru abo kampazicyju prymali da 1 vieraśnia, a z 10 pa 17 vieraśnia paabiacali zapuścić internet-hałasavańnie.
Pieramožcam paabiacali nie tolki publičnaje pryznańnie i dypłom, jaki ŭručać na abłasnych «Dažynkach», jakija sioleta praduć u Zasłaŭi, ale i materyjalnyja pryzy: pa 70, 60 i 50 bazavych vieličyń (heta značyć 2940, 2520 i 2100 rubloŭ) za 1, 2 i 3 miesca, adpaviedna, pa viersii acenačnaj kamisii; jašče 50 bazavych (2100 rubloŭ)-pieramožcu internet-hałasavańnia.
Siarod kankursantaŭ, jakija zaśviacilisia ŭ aficyjnym telehram-kanale Minskaha abłvykankama — jak užo zvykłyja dla biełarusaŭ zamki, traktary z samalotami i žyvioły, tak i davoli niestandartnyja varyjanty.
Naprykład, śpiecyjalisty adnaho z pradpryjemstvaŭ stvaryli na poli ceły łabirynt.
A pad Salihorskam inšaje pradpryjemstva «vylapiła» ź ciukoŭ vielmi simvaličnuju dla rehijonu postać — krata-šachciora.
Ci arhanizoŭvali aficyjna padobny konkurs u inšych abłaściach Biełarusi — nieviadoma, adnak, miarkujučy pa videa z sacsietak, jak minimum u virtualnaje spabornictva na zvańnie samaj aryhinalnaj skulptury z sałomy ŭklučylisia praktyčna ŭsie rehijony.
Tak, na Brestčynie na palach adnaho z ahrapradpryjemstvaŭ źjaviŭsia lehiendarny krejsier «Aŭrora» ŭ naturalnuju vieličyniu (nu, amal). Padabienstva z aryhinałam adznačyli mnohija kamientatary, pryčym niekatoryja navat vykazali na hety kont niekatoruju zaniepakojenaść.
«Nu voś što vy narabili? Ciapier jany pahladziać z kosmasu i skažuć, što ŭ nas źjaviłasia novaja raspracoŭka — suchaputnyja krejsiery», — žartam paŭščuvała aŭtaraŭ skulptury adna z hladačak.
Kampazicyju inšaha sielhaspradpryjemstva Bresckaj vobłaści ŭ tyktoku nazvali «samaj dušeŭnaj». Jaje aŭtary stvaryli «dom baćkoŭ», jaki «nie pradajecca», čym vyklikali prystup zamiłavańnia ŭ dziasiatkaŭ hledačoŭ.
Tyja, chto asabista pabyvaŭ na hetaj «baćkaŭščynie», asabliva adznačyli ŭvahu stvaralnikaŭ da detalaŭ.
«Bresckaja vobłaść sioleta zamaročyłasia. Tam navat kurački ź siena», — napisała adna z karystalnic tyktoka.
Miarkujučy pa inšych videa i fota ŭ sacsietkach, dzieści na prastorach biełaruskich paloŭ uzdoŭž tras siońnia možna taksama sustreć sapraŭdnaha (nu, amal) dynazaŭra, hihanckaha bahamoła i vielmi žachlivaha pavuka, jaki kamuści z hledačoŭ nahadaŭ Arahoha z suśvietu Hary Potera.
Ciapier čytajuć
Dyrektarka etałonnaha kałhasa ŭ Dobrušy 12 hadoŭ chavała padziež i źbivała padnačalenych. Adnaho sprabavała nakarmić siłasam22
Kamientary
Mabyć, adzin aŭtar. Jon paciešyŭ :)