У Расіі вайсковага пенсіянера асудзілі на 18 гадоў за расклейванне ўлётак «Спынім вайну разам»
Другі Заходні акруговы ваенны суд прыгаварыў 57-гадовага ваеннага пенсіянера і этнічнага ўкраінца Генадзя Арцёменку да 18 гадоў пазбаўлення волі ў калоніі строгага рэжыму па справе аб «дзяржаўнай здрадзе».
Падставай для завядзення справы стала расклейванне ўлётак з надпісам «Спынім вайну разам», паведамляе «Дождь».
Паводле інфармацыі арганізацыі, супрацоўнікі ФСБ прыйшлі з ператрусам да жыхара Дзяржынска ў кастрычніку 2023 года па справе аб захоўванні выбухоўкі, якую, як сцвярджае абарона, падкінулі. Арцёменку затрымалі. Пазней у яго тэлефоне выявілі падпіскі на ўкраінскія тэлеграм-каналы, у тым ліку на канал руху «Атэш» — вайсковага аб’яднання ўкраінцаў і крымскіх татараў.
Пра арышт мужчыны ў сакавіку 2024 года паведаміла рэгіянальнае УФСБ.
Следства сцвярджала, што Арцёменка ўступіў у кантакт з прадстаўнікамі «Атэш» і па заданні каардынатара нібыта фатаграфаваў будынак УФСБ у Дзяржынску і клеіў на слупах улёткі руху. Аднак, паводле звестак «Першага аддзела», перапіска, на якую спасылалася абвінавачанне, адсутнічае ў матэрыялах справы, і дзяржаўны абвінаваўца не здолеў прадставіць яе нават у судзе.
У арганізацыі таксама адзначаюць, што пасля пачатку вайны Арцеменка спрабаваў вывезці з Украіны пажылую маці. Ён звяртаўся ва ўкраінскія дзяржаўныя органы з просьбай дазволіць кароткатэрміновы ўезд. Пасля ўзлому яго электроннай пошты гэтую перапіску атрымалі расійскія сілавікі.
Цяпер чытаюць
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»12
Каментары