Інфекцыяніст расказаў, ці трэба здаваць кляшча на аналіз і колькі разоў піць доксіцыклін
Доктар-інфекцыяніст Мікіта Салавей даў адказы на «адны і тыя ж пытанні / трывогі / праблемы», што задаюць пацыенты, да якіх прысмактаўся клешч.
1. Пасля выдалення кляшча дастаткова аднаразова прыняць доксіцыклін. Прычым аднаразовы прыём дазволены не толькі дарослым, але і дзецям любога ўзросту, а таксама цяжарным (дазіроўкі для розных узроставых груп можна паглядзець тут).
Прыём доксіцыкліну на працягу 3‑5‑10‑пажыццёва дзён НЕ ПАДВЫШАЕ эфектыўнасць прафілактыкі хваробы Лайма і іншых бактэрыяльных клешчавых інфекцый, але прыводзіць да пабочных эфектаў і адмоўна ўплывае на вашу мікрабіёту. Як правіла, мікрабіёту лепш зберагчы, улічваючы, колькі антыбіётыкаў чалавек у сярэднім прымае за жыццё па розных прычынах.
2. Даследаваць падабраных кляшчоў на інфекцыі ў большасці выпадкаў БЕСКАРЫCНА. Нават калі клешч інфіцыраваны, медыкі НЕ ЛЕЧАЦЬ кляшчоў. Больш за тое, толькі невялікая частка інфіцыраваных кляшчоў перадае ўзбуджальнiкі чалавеку. Тактыка ў дачыненні да пацыента з інфіцыраваным бактэрыяльным узбуджальнікам кляшчом такая ж, як і ў дачыненні да пацыента з кляшчом НЕ інфіцыраваным па даных даследавання — усё той жа аднаразовы прыём доксіцыкліну ў першыя 72 гадзіны і назіранне за сваім самаадчуваннем і месцам укусу кляшча на працягу месяца.
Больш падрабязна глядзіце тут.
3. Калі клешч выдалены і прыняты доксіцыклін, звяртацца да доктара не варта — магічных аналізаў, якія паказвалі б магчымую раннюю інфікацыю кляшчом, не існуе.
Першыя антыцелы ў крыві пры клешчавым энцэфаліце наогул адсутнічаюць нават пры развіцці першай фазы інфекцыі, а першыя антыцелы пры хваробе Лайма з’яўляюцца толькі праз 4— 6 тыдняў пасля з’яўлення мігруючай эрытэмы на скуры.
4. Усё, што з’яўляецца на скуры ў першыя гадзіны і нават 1—3 дні пасля ўкусу кляшча, любое агульнае недамаганне ў гэты тэрмін — гэта ДАКЛАДНА НЕ КЛЕШЧАВАЯ ІНФЕКЦЫЯ. Ёсць паняцце інкубацыйнага перыяду — часу ад трапляння ўзбуджальніка ў арганізм да першых сімптомаў. І пры клешчавых інфекцыях любога паходжання гэты інкубацыйны перыяд не меншы за тры дні. На скуры даволі хутка можа з’явіцца алергічная рэакцыя на кампаненты сліны кляшча, а агульных недамаганняў можа быць мноства, і клешч тут далёка не заўсёды вінаваты. З узростам больш карысна дадатковы раз праверыць узровень артэрыяльнага ціску (і прыняць меры пры неабходнасці), чым шукаць вінаватых сярод членістаногіх.
5. Антыклешчавы імунаглабулін у Рэспубліцы Беларусь, паводле дзеючых клінічных пратаколаў і іншых нарматыўных дакументаў, НЕ ЎЖЫВАЕЦЦА для посткантактнай прафілактыкі клешчавага энцэфаліту, бо не паказаў эфектыўнасці ў прадухіленні захворвання, згодна з многімі даследаваннямі і клінічнай практыкай.
Адзіная эфектыўная стратэгія не захварэць — гэта загадзя вакцынавацца супраць клешчавага энцэфаліту. У краіне ёсць некалькі вакцын, і па неабходнасці магчымыя паскораныя схемы вакцынацыі.
Каментары